Тывада 2026 чылда уругларның чайгы дыштанылга лагеринге белеткел сөөлгү чадазында келген. ТР-ниң өөредилге сайыдының бирги оралакчызы Лариса Андалаева баштаан ажылчын бөлүк уруглар лагерьлериниң тургузукчуларынга, удуртукчуларынга, башкы болгаш техниктиг ажылдакчыларынга методиктиг деткимчени көргүзери-биле үнүүшкүннерни организастаан.
План езугаар бо чайын бүгү республикада ниитизи-биле 183 уруглар лагери ажылдаар, оларның аразында стационар, хүндүскү, майгыннар база бир күш-ажыл болгаш дыштанылга лагерьлери бар.
Ажылчын бөлүк май 16-дан эгелеп «Чагытай», «Орлёнок», «Байлак», «Металлург», «Таёжный», «Шолбан-Ак» лагерьлерни база Эрзин кожуунда «Отчугаш» база Тес-Хем кожуунда «Сайлык» лагерьлерни хынаан. Өөредилге яамызы бөлүктүң кол сорулгазы – дыштанылга объектилериниң инфратургузуунуң беленин, айыыл чок чорук дүрүмнерин сагып турарын, база дыштанылга программаларының шынарын хайгаараары болган.
«Бо хемчеглер дээрге уруг бүрүзү чайны таарымчалыг болгаш айыыл чок байдалга эрттирерин, инфратургузуг болгаш дыштанылга программалары амгы үениң негелделеринге дүгжүп турарын хандырар арганы бээр белеткелдиң чугула чадазы-дыр. Санитарлыг болгаш өрт айыыл чок чоруунуң нормаларын сагаанынче, уруглар-биле ажылдаар ажылдакчыларның белеткелинче, арга-арыг чоогунда объектилерниң хыналдазынче онза кичээнгейни салган бис» – деп, Лариса Андалаева демдеглээн.
Хыналдалар июнь төнчүзүнге чедир уламчылаар. Тускай мергежилдиглер чуртталга корпустарының, чемненир черлерниң, спортчу болгаш ойнаар шөлдерниң, эмнелге пунктуларының байдалын, ол ышкаш өртке удур дериг-херекселдиң бар-чогун база шын ажылдап турарын, чурттаар байдалдарның чурумга дүгжүп турарын экидир хынаар.
Бо хүннүң байдалы-биле алырга, шупту лагерьлерниң матриал-техниктиг баазазын четчелээр, ажылдакчыларны чыып, өөредир ажылдар доозулган. 159 хүндүскү, 21 стационар, ийи майгын, бир күш-ажыл болгаш дыштанылга лагерьлери 20 муң хире уругну болгаш элээдини ажыктыг дыштанылгаже хаар тударынга белеткенип турар.
