Начын Монгуш хостуг хүрешке Европа чемпиону болганынга чаңгыс чер чурттуглары чоргаарланып турарын Сүт-Хөл кожууннуң Төлээлекчилер хуралының даргазы Андрей Хертек дыңнаткан.
– Бистиң чаңгыс чер чурттуувус, Сүт-Хөл оглу, улуг бүзүреливис, ынаныштыг идегеливис Начын Монгуш хостуг хүрешке Европа чемпионадынга алдын медальды чаалап алганын улуг чоргаарал-биле хүлээп алдывыс.
Ол хөй-хөй аныяктарга дириг үлегер-чижек-тир. Чүткүл-соруу быжыг мөге чүгле Тываның болгаш Россияның эвес, а делегей спортунуң төлептиг оглу апарганын билир бис.
Мөгевистиң авазы Шеңне Дадар-ооловнага, ачазы Өлзей Сергеевичиге база спорттуң улуг оруунче чүглендирип чоруур тренер башкылары Владимир Хуураковичиге, Алибек Юрьевичиге изиг байырывысты чедирип тур бис.
Сүт-хөлчүлерниң өмүнээзинден аныяк мөгевиске ам-даа хөй-хөй спортчу чараш хүрештерни, чайынналчак тиилелгелерни, бедик тура-сорукту, хей-аътты, чаагай чолду күзеп тур бис!
