Сүт-Хөл кожууннуң Александр Ондар аттыг төп культура бажыңынга Тывада чарлаттынган Тургузукчу күш-ажылдың болгаш өг-бүле ыдыктарының чылының байырлыг ажыдыышкыны болуп эрткенин чагырга чери дыңнаткан.
Кожууннуң социал-экономиктиг хөгжүлдезинге улуг үлүг-хүүзүн кииреринден аңгыда, салгал дамчаан ажыл-ижин чедиишкинниг уламчылап чоруур болгаш ажы-төлүн төлептиг кижилер кылдыр өстүрүп, кижизидип турар өг-бүлелерни суур бүрүзүнден илередип, онзалап демдеглээн.
Салгал дамчаан ажыл-ишчи өг-бүлелерниң аразынга «Быжыг өг-бүле – күштүг Россия» деп шуулганны база эрттирген. Өг-бүлелер ажыл-амыдыралының дугайында видеокөргүзүгнү, салгалдан салгал дамчаан ажыл-ижи-биле таныштырылганы база уран салым-чаяанын бараалгадып, мөөрейлешкен.
Бирги черге Кызыл-Тайгадан алдар-аттыг артистерниң салгалдары Али, Саида Донгактарның, ийиги черге Ак-Даштан хоочун башкылар Павел, Зоя Ондарларның, үшкү черге Суг-Аксы сумузунда хоочун башкылар Виктор, Чаш-Уруг Монгуштарның өг-бүлелери төлептиг болган. Тиилекчилер девискээр аайы-биле шуулганга киржир эргени чедип алган.
Хемчег үезинде ногаажыларның ногаа, чимис өзүмнериниң делгелге-садыглаашкынын, төп кожуун эмнелгезиниң эмчилери Бүгү делегейниң кадыкшыл хүнүнге тураскааткан акцияны эрттирген.
Төп ном саңының ажылдакчылары “Кайда күш-ажыл, ында аас-кежик”, “Өг-бүле – өттүр адаан, утка сиңген сөзүвүс-түр, өгде кым бар? Өг ээзи, өг ишти, ажы-төл, өгбелер, төрээннер, төрелдер – бүгүдези, өртемчейде бүзүрелдиг күш, бүле ол-дур” деп тыва езу-чаңчылдарга даянып, делгелгени сонуургаткан.
