Россияның шииткекчилер каттыжыышкынының регионда салбыры Дээди Судка Тываның шииткекчилериниң аразынга стол теннизинге маргылдааны эрттиргенин шүүгү чери дыңнаткан.
Маргылдаага Тываның Дээди, Арбитраж судтарының, Кызылдың хоорай, Кызыл, Чөөн-Хемчик, Тес-Хем, Улуг-Хем, Чеди-Хөлдүң район судтарының болгаш Кызыл хоорайның, Улуг-Хем база Кызыл кожууннарның суд участоктарының эптештирилге шииткекчилери киришкен.
Суд системазының хоочуннары – хүндүлүг халажылгада шииткекчилер Анна Ондар (Дээди Суд), Валерий Кара-Сал (Чеди-Хөлдүң район суду), Марина Сат (Кызылдың район суду) аныяктар-биле бир деңге маргылдашкан.
Теннисчилерни үш бөлүкке чарган, маргылдаа долгандырыг системага эрткен. Шаңналдыг черлер дээш ойнаар эргени чаалап алган эң шыырак спортчуларны бөлүк аайы-биле тодараткан.
Эр теннис ойнакчыларының аразынга бирги черде Улуг-Хем кожууннуң бир дугаар суд участогунуң эптештирилге шииткекчизи Валентин Дамчай, ийиги черде ТР-ниң Дээди Судунуң шииткекчизи Шолбан Бадыраа, үшкү черде Кызылдың район судунуң шииткекчизи Сылдыс Монгуш.
Тергиин херээжен теннис ойнакчыларының санынче Улуг-Хемниң район судунуң шииткекчизи Алдын-Ай Ойдупаа, Кызылдың хоорай судунуң шииткекчизи Солангы Ондар, Улуг-Хемниң район судунуң шииткекчизи Светлана Ондар олар кирген.
«Тиилелгеже чүткүл» шаңналга хүндүлүг дыштанылгада шииткекчилер – Анна Ондар, Валерий Кара-Сал, Марина Сат база Кызыл кожууннуң ийи дугаар суд участогунуң эптештирилге шииткекчизи Сылдыс Дажы-Сегбе төлептиг болган.
Февраль 28-те тиилекчилер Тываны Москваның «Лужники» стадионунга Россияның шииткекчилериниң аразынга болуп эртер спартакиадага төлээлээр. Спортчу хемчегниң эрттирикчилери шииткекчилерге Россия чергелиг маргылдаага чедиишкинниг киржирип күзээн.