Шагааның ак айында ТР-ниң Өөредилге яамызы, Национал школа хөгжүдер институт база Улуг-Хем кожууннуң өөредилге эргелели «Шаг чаагай, Шагаа чаагай!» деп республика чергелиг эртем-практиктиг конференцияны эрттиргенин яамы дыңнаткан.
Тываның өөредилге сайыдының оралакчызы Белекмаа Ондар конференцияны ажыдып, киржикчилерге байыр чедирген.
Конференция киржикчилери – республиканың уруглар садтарының башкылары. Олар Шагаа философиязының дугайында школа назыны четпээн уруглар өөредилгезиниң контекстизинде ханы чугаалажыр аргалыг болган. Чүге дизе уруглар садтарында чаш уругнуң сагыш-сеткили баштайгы хар дег арыг турда делегейже көрүштүң, улугларга хүндүткелдиң болгаш төрээн культуразынга ынакшылдың үндезиннерин тургузуп турар дизе чазыг болбас.
Хүн-бүрүде боттарының төөгүзүн билир, өгбелериниң езу-чаңчылдарын хүндүлеп, төрээн тыва дылынга чугаалажыр хамаатыларны өстүрүп, эң нарын сорулганы күүседип турар хүндүлүг кижилер – кижизидикчи башкылар.
Конференцияның программазында чонну дүвүредип турар темаларга илеткелдерниң үнелиин келген аалчылар демдеглээн. Тываның Өөредилге яамызының ниити билиглер килдизиниң специализи Урана Допул Шагааның ыдыктыг сүзүктериниң школа назыны четпээн уругларга өөредип, кижизидериниң чугулазын демдеглээн.
Национал школа хөгжүдер институттуң тыва филология лабораториязының эргелекчизи Альбина Монгуш ажы-төлүвүстүң тыва дылын билириниң деңнелин хайгаараанының түңнелдерин, сагыш-сеткилдиң үнелиг чүүлдериниң дугайында база көшкүн чоннарның чаңчылдарының амгы үеде өг-бүледе канчаар боттанып турарының дугайында илеткелди кылган.
Конференция арга-дуржулга солчулгазы болурундан аңгыда, сагыш-сеткилдиң аразында чугаа болган деп башкылар демдеглээн . Илеткелдер, ажык чугаа бүрүзү тыва культуравысты кадагалап арттырар улуг херекке үлүг-хуу болган
.
2027 чылда эртем-практиктиг конференцияны Чаа-Хөл кожууннуң өөредилге эргелели эрттирер.