Барыын-Хемчик кожууннуң бойдус-чурумалдыг черинде «Шолбан-Ак» уругларның кадыкшылга лагериниң ажыдыышкыны уттундурбас солун болуп эрткенин ТР-ниң Өөредилге яамызы дыңнаткан.
«Шолбан-Ак» лагериниң бирги ээлчээниң байырлыг ажыдыышкыны 60 хире аас-кежиктиг уруглар, оолдарга кайгамчыктыг болуушкун болуп артар.
Кожууннуң чагырга даргазының экономика талазы-биле оралакчызы А.А. Сарыглар, өөредилге эргелелиниң удуртукчузу С.А. Ооржак уругларга эң-не чылыг-чымчак сөстерни чугаалап, быжыг найыралды, хүннүң херелдери шонуп турар чайгы хүннерни күзээннер. Ооң соонда сцена дирлип үнген: лагерьниң вожатыйларындан тургустунган «Шолбанята» ансамбльдың сеткил хайныышкынныг көргүзүү хамыктың кичээнгейин хаара туткан. Оларның хөглүг ырлары долгандыр улустуң хей-аъдын көдүрген.
Уруглар хөглүг ырыларны күүседип, самнап, катаптаттынмас байырланчыг байдалды тургусканнар. Ыры-сам бүрүзү өөрүшкү болгаш чүректиң ханызындан үнүп турган. Көрүкчүлерниң адыш часкаашкыннары диңмиреп, уругларның арын-шырайы аас-кежик болгаш магадаашкын-биле долган.
Бо чылдың июнь 16-да «Шолбан-Ак» стационарлыг лагерьниң бирги ээлчээниң ажыдыышкыны анаа-ла байырлал эвес, а езулуг-ла салым-чаяанныгларның шоу-көргүзүү болуп, кайгамчыктыг, интерактивтиг ужуражылга болган. Ол хүнден эгелээш, «Шолбан-Акта» дыштанып келген уруглар ужуралдарның, найыралдың, уттундурбас болуушкуннарның делегейинче шымныгып кирген.