Тываның Чонну ажылга хаара тудар төвү социал керээге үндезилээн күрүне деткимчезинче билдириишкиннерни хүлээп турар.
Республикада социал керээге үндезилээн күрүне деткимчезин алырынче билдириишкиннер хүлээп алыры уламчылавышаан. Бо деткимчени «Өг-бүле» национал төлевилел-биле эвээш орулгалыг өг-бүлелерге болгаш чааскаан чурттап чоруур хамаатыларга социал деткимче көргүзер күрүне программазы-биле боттандырып турар.
Социал керээ дээрге күрүне биле кижиниң аразында бизнес эгелээринге, ажыл тып алырынга, чаа мергежилге өөредиринге азы дузалал ажыл-агыйы эгелээринге керээни чарар.
ТР-ниң Чонну ажылга хаара тудар төптүң дыңнатканы-биле алырга, бо чылдың тос айларында 2261 «социал керээни» чарган. 2025 чылдың төнчүзүнге чедир социал керээге үндезилээн күрүне деткимчези 3268 кижини хаара тудар ужурлуг. Республиканың кожууннардан Кызыл кожуун 97, Чөөн-Хемчик кожуун 51 база Улуг-Хем кожуун 32 керээни чарган. Тес-Хем кожуун биле Ак-Довурак хоорай 27 база 26 керээ чаргаш, 4-5 дугаар черлерде.
Чөөн-Хемчик кожуундан 60 хамааты хууда дузалал ажыл-агыйын тудар керээни чарган. Кызыл кожуун – 44, Улуг-Хем – 34. Дөрткү черде Таңды кожуундан 32 керээ, Барыын-Хемчик биле Каа-Хем кожууннар тус-тузунда 29 керээни чарган.
Тывада чурттакчыларның амыдырал-чуртталгазының деңнелин бедидеринге күрүне деткимчези турум шимчээшкинни болгаш үре-түңнелди көргүскен. Тодаргай медээни Кызыл хоорайның Кочетов кудумчузунуң 35 дугаарлыг бажыңында Тыва Республиканың Чонну ажылга хаара тудар төвүнден ап болур. Телефону: +7 (39422) 2-10-10, +7 (39422) 3-69-96.