«Көдээ девискээрлерниң комплекстиг хөгжүлдези» федералдыг программаның чорудуу-биле Сукпакта чаа хөй-ниити девискээри – уругларга амгы үениң ойнаар шөлчүгешти байырлыг байдалга ажытканын сумунуң культура төвү дыңнаткан. Чаа ойнаар шөлчүгеш айыыл чок ойнаар херекселдер-биле дериттинген.
Федералдыг программа-биле чурттакчылыг черлерде чаагайжыттынар объектилер тудуунга «Тардан Голд» кызыгаарлаан харыысалгалыг ниитилел деткикчи ачы-дузазын көргүзүп турар. Даг-тывыш компаниязының деткимчези-биле Сукпакта социал объектини туткан.
Бо чылын республикада «Көдээ черлерниң комплекстиг хөгжүлдези» программа-биле көдээ суурларның социал инфратургузуун экижидер элээн каш төлевилелдер боттанып турар. Кызыл кожууннуң Сукпак суурда уруглар ойнаар шөлчүгештен аңгыда Тес-Хем кожууннуң Самагалдай суурда роллердром-скейт-паркты, Өвүрнуң Хандагайты суурда «Россия – Тыва» тураскаалды чаагайжыдар, Бай-Тайгада Ээр-Хавак суурда уруглар ойнаар универсалдыг спортчу шөлдү дериир ажылдар чоруп турар.