Сүт-Хөл кожууннуң Алдан-Маадыр суурнуң мурнуу девискээринче Хемчик хемниң унну чоокшулааш, суг улгадыр болза, чуртталга бажыңнарын ап болурунуң айыылы тургустунуп турарын чагырга чери дыңнаткан.
Чоннуң дүвүредип турар айтырыы ТР-ниң Арга-арыг ажыл-агыйы база бойдус ажыглалының яамызының болгаш кожуун чагыргазының доктаамал хайгааралында.
Эрик камгалалының ажылдарын боттандырары-биле төлевилел-дөзевилел документилерин яамы долузу-биле ажылдап кылгаш Россия Федерациязының чогуур яамызынче киирген. Амгы үеде камгалал чалды кылырынга херек акша-төгерик айтырыын шиитпирлеп турар.
ТР-ниң Чазак даргазының оралакчызы Уран-оол Ондарга баштаткан ажылчын бөлүк Тываның Чазааның 2025 чылда отчедун таныштырган соонда, кожууннуң удуртулгазы-биле ук девискээрге чедип, байдалды хынап көрген.
Сугнуң деңнели улгадыр болза, чурттакчыларга айыыл тургустунуп болурун демдеглээш, суму деңнелдиг онза байдал чурумун чарлаарын сүмелээн.