Кызыл хоорайның мэри Айдын Сарыглар Санкт-Петербургтуң өрт-камгалал колледжиниң бирги курсчузу Сыдым Амбаржиге «Изиг Чүрек» хөрек демдээн тывысканын республиканың немелде өөредилге сайзырадыр төвү дыңнаткан.
Сыдым Амбаржи Тоора-Хем ортумак школазынга өөренип тургаш, маадырлыг чорукту кылган. Ынчан улуг назылыг эр кижи Улуг-Хемниң дожунуң адаанче дүже берген. Ол үеде Сыдым дарый Онза байдалдар яамызының камгалакчыларын кыйгыргаш, ийи эжи-биле дош кырынга дараалаштыр чыдыпкаш, камгалакчылар келгижеге чедир когараан кижини суг кыдыынга тудуп турган.
Элээди оолдарның демниг, коргуш чок чоруундан дош адаанче дүже берген кижини камгалап шыдаан.
Чурттуң соңгу найысылалында өөренип турар сургуулдуң маадырлыг чоруу – езулуг эр кижиниң үлегери.