Тыва тускай шериг операциязының киржикчилерин деткиири-биле хамааты амыдыралга чаңчыктырарынче болгаш ниитилелче киреринче угланган программаларны идепкейлиг боттандырып турар.
Республикада «Үре-түңнелдиг болгаш чижилгелиг экономика» национал төлевилел боттандырылгазы-биле ажылдап турар «Агростартап» программа – кол эгелээшкиннерниң бирээзи. Бо программа агроүлетпүр комплекизинде бизнес-төлевилелдерни боттандырарынче грантыларны берип турар.
2025 чылда грант мөөрейинге 142 кижи киришкен, оларның аразында тускай шериг операциязының хоочуннары база бар. Хамаарышпас эксперттерден болгаш хөй-ниити организацияларының төлээлеринден тургустунган мөөрей комиссиязы киржикчилерниң төлевилелдерин кичээнгейлиг өөренип көрген. Ооң түңнелинде 14 төлевилелдиң авторлары тиилээн, оларның бежи тускай шериг операциязының хоочуннары болза, а ийизи – оларның өг-бүле кежигүннери.
Төлевилел киржикчилерниң бирээзи Сай-Даш Барынмаа, «Вагнер» хууда шериг компаниязы-биле тускай шериг операциязынга киришкен соонда, төрээн черинге чанып келгеш, амыдыралдың чаа агымынче кирген. Ол үш сая рубль грант акшазын ажыглап, тракторну, 11 баш аътты садып ап, аът кажаазын туткан. Тускай шериг операциязының хоочуну чылгы мал азыраар улуг арга-дуржулгалыг болгаш, «Агростартап» программаның база бир киржикчизи-биле кады аът заводун ажыдар планныг.
«Агростартап» программадан аңгыда, аграрлыг бизнес хөгжүдер күзелдиг тускай шериг операциязының хоочуннарынга тускай деткимчени көргүзер «Агромотиватор» деп база бир чугула программа республикада боттанып турар. Бо чылын тускай шериг операциязының ийи киржикчизи мөөрейлиг шилилгени эрткеш, грантыларны алганнар.
Тускай шериг операциязының киржикчилери болур 600 кордакчы аразындан 30 хоочун шилилгени эрткеш, «Тываның маадырлары» кадрлар программазы езугаар чедиишкинниг өөренген. Төлевилелдиң киржикчилериниң бирээзи Руслан Мамедов амгы үеде ТР-ниң Көдээ ажыл-агый болгаш аъш-чем яамызында практиказын эртип турар. Ооң дагдыныкчызы – албан чериниң удуртукчузу Юрий Оруспай.
«Бистиң ниити сорулгавыс – эрге-чагырга органнарынга болгаш өске-даа чугула адырларга республиканың чаагай чоруу дээш боттарының арга-дуржулгазын ажыглаарынга белен, чүткүлдүг болгаш шыырак тускай мергежилдиглерни белеткээри» – деп, маадырның дагдыныкчызы чугаалаан.