“Ада-чурттуң камгалакчылары” күрүне фондузунуң салбырынга социал керээге үндезилээн күрүне деткимчезин алыр дээн тускай шериг операциязының хоочуннарын комиссия хүлээп алган.
ТР-ниң Күш-ажыл болгаш социал политика яамызының “Ада-чурттуң камгалакчылары” күрүне фондузунуң салбыры-биле кады бо ийи дугаар эртип турар комиссиязы-дыр. Ниитизи-биле Тожу, Каа-Хем, Бии-Хем, Улуг-Хем, Чеди-Хөл, Чаа-Хөл кожууннардан болгаш Кызыл хоорайдан он бир кижи билдириишкинни киирген. Оларның бежи онлайн-хевирге төлевилелдерин камгалаан.
Күш-ажыл болгаш социал политика сайыды [id17770507|Эдуард Санданга] удурткан комиссия он кижиниң бизнес-төлевилелдерин чүүлдүг деп көрген. Күрүне деткимчезиниң бир алыкчызы төлевилелин чедир кылып ажылдааш, дараазында комиссия үезинде келир болган.
Тускай шериг операциязының хоочуннары ыяш дилиндектээр, чазаныр цехтер, идик септээр чер, картофель тарып өстүрер, автотранспорттуң септелгезин кылыр болгаш “алдын холдуг мастерниң” ачы-дуза чедирилгезин чорудар, хууда дузалал ажыл-агыйы ажыдар күзелин илереткен.
Чаа-Хөл болгаш Улуг-Хем кожуундан киржикчилер бода мал тудуп, сүт аймаан болбаазырадыр болган.
Турандан шевер Андрей Кулуктар идик септээр чер ажыдар деп турар. Күрүне деткимчизиниң алыкчызы эге дээрезинде идиктер септээрин, чоорту идик даарап эгелээрин дыңнаткан. Ол даараан хөм идиктерин кедип алгаш, комиссия кежигүннеринге көргүскен-даа. Күскү, часкы идиктиң өртээ – 8000 рубль.
Социал керээге үндезилээн күрүне деткимчезин алыр дээн тускай шериг операциязының киржикчилериниң өг-бүлезиниң кежигүннерин комиссия март алдыда хүлээп алырын фонд дыңнаткан.
Хууда ажыл-херээн ажыдып алыры дээш 350000 рубль, хууда дузалал ажыл-агыйын ажыдып алыры дээш 200000 рубль күрүне деткимчези көрдүнген. Ук акша-хөреңгини дериг-херексел, мал-маган садып алырынче угландырар.
