Чеди-Хөл кожууннуң төп үлегер-майыктың ном саңында уругларның түр када дыштаныр төвүнге Тыва дыл хүнүнге тураскааткан «Тыва дылым чоргааралым» деп этнокультурлуг хемчег болуп эрткенин ном саңы дыңнаткан.
Ном саңының ажылдакчылары уругларга хемчег солун болгаш өөредиглиг болзун дээш аңгы-аңгы аргаларны ажыглаан.
- тыва дылга өг-бүлениң кежигүннерин шын адап өөредири;
- тыва дылга өгге болгаш бажынга аҗыглаар херекселдерниң аттары-биле таныштырары;
- тыва дылга кыс уругларның каасталгаларының аттарын адаары;
- тыва дылга чеди чузун малдың аттары-биле таныштырары;
- төрээн дылынга хумагалыг болурунче уругларның кичээнгейин угландырары.
«Тыным, сүзүүм, чоргааралым, тыва дылым – төрээн дылым» деп угаап- билип, тыва дылывыска өг-бүлевиске чугаалажып, алгап, алдаржыдып, ырлап, шүлүктеп чоруулуңар» – деп, ном саңының ажылдакчылары кыйгырган.
Ол ышкаш уругларны тыва оюннар-биле таныштырар, канчаар ойнаарының дүрүмнерин кады сайгарар, тыва сөстернин утказын тайылбырлаар хемчегни база эрттирген.