Тускай шериг операциязының киржикчизи Чаян Бурбу эникти дайынчы хөделиишкиннер девискээринден эккелгеш, авазынга белекке берген. Тыва Хатико ээзин сөөлгү катап аэропорттан үдээн турган. Ол ээп келбээн. Оон бээр Умка ээзин манавышаан. Ужар-хемеден шериг хептиг улус дүжүп келирге, ыт оларның чанынга келгеш, арын-шырайын идегел-биле топтап көрүп турар.
Дайынчының чоок кижилери Умканы бажыңынче ап алырга-даа, ол ээзин сөөлгү катап көрген черинче катап эглип келир болган.
Умка ам аэропорттуң ажылдакчыларының хайгааралында, дайынчының дөргүл-төрели база өйлеп-өйлеп кээп турар. “Ыт – кижиниң шынчы өңнүү” дээри анаа эвес.
Чаян Бурбу тускай шериг операциязының үезинде дайынчы хүлээлгезин сыныш чок күүсеткеш, амы-тынындан чарылган. Маадырны «Эрес-дидим чоруу дээш» орден-биле мөчээн соонда шаңнаан.