Тыва – онзагай культуразы болгаш кайгамчык бойдус чурумалы-биле туристерни хаара тудуп турар

Даг-Алтайга Россияның Чазааның Даргазы Михаил Мишустинниң эрттиргени туризм болгаш аалчылар хүлээп алырын хөгжүдериниң талазы-биле хуралга Тываның Баштыңы [id360104045|Владислав Ховалыг] киришкен.

Хуралга чурттуң иштики каттышкан продуктузунга туризм адырының үлүүн көвүдедир аргаларны чугаалашкан. Бөгүнде ол үш хууну тургузуп турар, а 2030 чылга чедир беш хуу чедирер сорулганы күрүне баштыңы бүгү деңнелдиң эрге-чагыргазынга салган. Президентиниң эгелээшкини Тываның туризмни экономиканың орулгалыг угланыышкыннарының бирээзи кылдыр дээн шагдан бээр планнары-биле дүгжүп турар.

«Тывага эчис сорулгалыг чугула угланыышкын бо-дур. Бистиң республикаже турисчи агым чылдан чылче өзүп турар. Күрүнениң, ылаңгыя социал-экономиктиг хөгжүлдезининиң амы-хууда программа таварыштыр, бизнести деткээн боттуг хемчеглери улуг идиглиг болган. Бо ажылдың түңнелдери көскү: амгы үениң аалчылар бажыңнары болгаш турисчи баазалар туттунуп, инфратургузуг шапкын хөгжүп турар» – деп, Владислав Ховалыг дыңнаткан.

Он хонук болгаш Тывага делегей чергелиг IV сарыг шажын шуулганы Россияның регионнарындан база даштыкы чурттардан муң ажыг аалчыларны хүлээп алыр. Тыва кайгамчык болуушкуннар чокка-ла, онзагай культуразы болгаш кайгамчык бойдус чурумалы-биле туристерни хаара тудуп турар. Бо удаада шуулганның дыка хөй аалчылары болгаш киржикчилери бистиң республикавыска келгеш, ооң ужур-чаңчылдары, культуразы, сүлде-сүзүүнүң ыдыктары-биле бир дугаар таныжып, сонуургаарлар.

«Бо чүүл бистиң культурлуг харылзааларывысты быжыглаарындан аңгыда, муң-муң чаа аян-чорукчуларга Тываны ажыдар дээрзинге бүзүрээр мен. Бистиң бойдузувус болгаш онзагай культуравыс туристерни хаара тудуптар езулуг сорунза-дыр. Республика экономиказының идегелдиг үндезининиң бирээзи апаар аалчылар хүлээп алыр адырны бүгү тала-биле деткиирин уламчылаар бис» – деп, Тываның Баштыңы МАХ-та бодунуң каналынга бижээн.