Тывада 31000 өөреникчи болгаш студент Пушкин картазын ажыглап турар

Аныяктарның культурлуг хемчеглерже хаара тудар сорулгалыг «Пушкин картазы» программа Тывада эки боттанып турар.

Бо хүнде ук программада республиканың 118 культура албан чери коштунган. Оларың санында музейлер, театрлар, концерт коллективтери, муниципалдыг культура төптери болгаш клубтар, ном саңнары, уругларның уран чүүл школалары, кинотеатрлар, чогаадыкчы төптер бар.

Тываның Культура яамызының дыңнатканы болза, бо чылдың тос айларында республикага 500 хире хемчег эрткен, ынаар 22726 билетти пушкин картазы-биле саткан. Билеттер садып алырынга чарыгдаан акшаның ниити түңү 16 сая ажыг рубль болган. Республиканың культура албан черлери хемчеглерниң хөй кезии – 302 хемчегни эрттирген болза, муниципалдыг культура организациялары 195 хемчегни организастаанын демдеглээри чугула.

Бир хемчегни программаже кииртир дизе, ол Эксперт чөвүлелиниң хыналдазын эртер ужурлуг. Чөвүлелдиң составында культура адырындан, аныяктар политиказындан, Тыва Республиканың ИХЯ-дан төлээлер, психолог башкы кирип турар. Чөвүлел чыл эгезинден бээр программага киржир дугайында 761 билдириишкинни сайгарып көрген.

ТР-ниң Культура яамызы «Пушкин картазы» программаже шупту культура албан черлерин киирер дээш ажылдап турар. «Найырал» кинотеатры биле И.Г. Сафьянов аттыг орус культура төвүн, ол ышкаш көдээ аныяктарның культурлуг амыдыралынга чугула черни ээлеп турар көдээ культура бажыңнарын ынаар киирери – мурнады боттандырар угланыышкын.

«Пушкин картазы» – бүдүн чуртта культурлуг хемчеглерже билеттерни бир чыл дургузунда садып ап болур 5000 рубль акша шыгжамырлыг банк картазы дээрзин сагындыраал. 14 хардан 22 харга чедир аныяктар картаны ажыглаар эргелиг. Ону күрүне ачы-дузаларының порталы таварыштыр билдириишкин кииргеш, халас кылдырып ап болур.