Тывада ЭКО дузазы-биле 2025 чылдың эгезинден бээр 27 чаш төрүттүнген. Регионнуң Кадык камгалал яамызының дыңнатканы-биле алырга, аас-кежиктиг өг-бүлелерден 14 кыс, 13 оол бодараан.
Кылымал иштелиишкин (ЭКО) дээрге божувас чорукту ажып эртер амгы үениң аргазы, ону «Өг-бүле» деп чаа национал төлевилелче бо чылдан эгелеп киирген. А ам өг-бүлелерге ачы-дуза чедирериниң бо сайзыраңгай аргазы чонга чедингир апаар. Процедураны албан медицина камгаладылгазының хуудузу-биле халас кылып болур, кол негелде – баш бурунгаар хыналда шинчилгелерни эртери.
Тывада бергедээшкиннерлиг 90 өг-бүле 2025 чылда ЭКО шинчилгезин эрткен, оларның 51 өг-бүлезин ЭКО-же чоруткан, бо хүнге чедир 6 өг-бүле өөрүнчүг түңнелди чедип алган.
Перинаталдыг төптүң консультация-диагностика салбырының эргелекчизи Анай-Хаак Салчактың тайылбырлап турары-биле алырга, ЭКО-нуң чедиишкинниг болуру хөй чүүлдерден хамааржыр. «Ол дээрге өг-бүлениң назы-хары, божуп шыдаваанының чылдагааннары болгаш хуусаазы дээш, өске-даа чылдагааннар бар. 35 хар четпээн херээженнерге ол эки үре-түңнелди дүрген эккээр» – деп, эмчи демдеглээн.
Россияда 2024 чылдан бээр эр болгаш херээжен улустуң үре-сады кадыкшылын камгалаары-биле эмчи шинчилгелериниң программазы ажылдап турар. Бо дээрге иштелип-саатталып шыдавас чорукка шинчилгени үе шаанда эртип, эмнедир арга-дыр.
Бир чыл иштинде иштелбээн база үре-сады кадыкшылында айтырыгларлыг улус ЭКО-ну ажыглап турар. Ада-ие болуксаан өг-бүле тускай хыналданы эртер, бир эвес аарыглар илереттинген болза, эмнээшкинни чорудар, ынчан ооң түңнелин манаар. Бир эвес иштелбээн болза, өг-бүлени албан эмчи камгаладылга системазы-биле ЭКО кылырынче чорудар.
ЭКО дузазы-биле 2022 чылда 42, 2023 чылда 53, 2024 чылда 47 чаштар төрүттүнген.
Республиканың Перинаталдыг төвүнүң консультация-диагностика салбырының 8 (39422) 6-01-90 дугаарда регистратуразынче долгааш, консультацяже бижидип ап болур.
Трудовой семестр студентов СПО Тувы в полном разгаре
Трудовой семестр студенческих отрядов техникумов и колледжей Тувы в самом разгаре, студенты задействованы в самых различных областях.
