Тываның Баштыңы Владислав Ховалыг 55-ки гвардейжи тускай мото-адыгжы (даг) бригаданың шериг албан-хүлээлгелиглериниң дилээ-биле тудуг материалдарын база дизельдиг генераторну сатканын дыңнаткан. Регионнуң «Деткимче» фондузунда чыгдынган акша-хөреңгини ажыглап, дузаны чоруткан. Материалдарны болгаш дериг-херекселдерни Донда Ростов хоорайга чедирген.
«Дайынчыларывысты деткиирин, оларның дилеглерин күүседирин кызыдар бис. Чоокта чаа олар тылдың инфратургузуун өскээр көжүреринге херек тудуг материалдары садып алырынга дузалажырын дилээн. Шериглер чаңгыс черге турбас: тулчуушкуннар болуп турар бир черден өске черже көжүп чоруурлар. Ооң-биле кады аъш-чем, чурттаар черин, эмчи дузазын болгаш дыштанылгазын хандырып турар албан черлери кады шимчеп чоруптар» – деп, В. Ховалыг бодунуң блогунда тайылбырлаан.
Шериг албан-хүлээлгелиглер чиик болгаш быжыг ОСБ-плиталарны садып бээрин дилээннер. Дайынчылар тыл албан черлеринге көжүп чоруур хоргадал чери кылдыр тударынга ону ажыглаар планныг.
«Деткимче» фондузунуң акша-хөреңгизи-биле Донда Ростов хоорайга 5000 ОСБ-плитаны болгаш амгы үениң үш фазалыг 20 кВт дизельдиг генераторун садып алган.
Шериг албан чериниң начальнигиниң дыңнатканы-биле алырга, 55-ки гвардейжи мото-адыгжы бригаданың материалдыг хандырылга албаны бистиң шериглерниң турумчуур черлеринге чедир тудуг материалдарын сөөртүрүн хандырган. Генераторну удавас чорудар.
"Оолдарывыс идегелдиг ынаныш база деткимче барын билип чорууру биске чугула" – деп, Владислав Ховалыг демдеглээн.
«Деткимче» фондузу 2022 чылда тургустунган. Тускай шериг операциязының девискээринде шериг албан-хүлээлгелиглерни деткиири – фондунуң ажыл-чорудулгазының бир угланыышкыны. Тускай шериг операциязының киржикчилерин деткииринге үлүг-хуузун киирип турар бүдүрүлгелерден, бизнестен, организациялардан база чаңгыс чер чсурттугларның ачы-дузаны фондуда чыып турар.
Тываның шериг албан-хүлээлгелиглерниң дилээ езугаар, Фондунуң саң-хөө деткимчези-биле 2024, 2023, 2022 чылдарда тускай шериг операциязының девискээринче чүгле техниктиг дериг-херекселдерни эвес, а Донбасстың тайбың чурттакчыларынга ачы- дузаны чедирип турар.