Тываның Баштыңы Владислав Ховалыг «ЦСКА-Тыва» спорт школазынга спорт комплекизин тудар дээн дилээнге Россияның Камгалал яамызындан чогумчалыг харыыны алганын дыңнаткан.
Россияның Айыыл чок чорук чөвүлелиниң секретары Сергей Шойгунуң деткимчези-биле Кызылга 2015 чылда ажыттынган спортчу комплекс республиканың уругларынга бокс, дзюдо, спортчу хүреш, ча адар, уран гимнастика деп спорттуң беш аңгы хевиринге профессионал деңнелге белеткенир арганы берип турар.
«Камгалал яамызы 2027-2028 чылдарда спорт комплекизин болгаш ажык спортчу шөлдерни тударынче бюджет акша-хөреңгизин тускайлаар шиитпирни хүлээп алган. Сергей Күжүгетовичиниң эгелээшкини-биле тудар келир үениң спортчу объектизи ийи чугула сорулгалыг: бирээде, «ЦСКА-Тыва» школаның белеткелдеринге херек инфратургузугну тудар, а өскезинге – шериг албан-хүлээлгелиглерге болгаш найысылалдың бүгү чурттакчыларынга спорт-биле өңнүктежир арганы тургузар» – деп, Владислав Ховалыг бодунуң телеграмм каналынга дыңнаткан.
Тываның Баштыңы объект тудар черни аңгылап, ону бүрүткедир айтырыгны шиитпирлээрин чогуур яамыларга дааскан. Ол объект ынаар баар чонга таарымчалыг черге турар ужурлуг.
Республиканың удуртукчузу оон аңгыда уран гимнастика, ийи кижиниң тулчур спортчу оюннары, бокс, ча адарының залдарын база ажыл-агыйжы кезектерни төлевилелче киирерин саналдаан. Ол ышкаш объектиниң чоок-кавы девискээринге аңгы-аңгы спортчу дериг-херекселдерлиг болгаш хол бөмбүү, теннис, баскетбол, биче бут бөмбүү, бадминтон ойнаар ажык спортчу шөлдерни тудар.
ТР-ниң Спорт яамызының дыңнатканы болза, бо хүнде «ЦСКА-Тыва» спорт школазында бедик мергежилдиг 12 тренер башкы – Россияның алдарлыг спорт мастери Елена Достай (ча адары), Россияның делегей чергелиг спорт мастери Саян Санчат (бокс), Россияның спорт мастерлери Алена Удод (гимнастика), Рудольф Монгуш (бокс), Темир Монгуш (дзюдо), Ай-Даш Самдан, Менги Санаа (хостуг хүреш), Евгений Ондар (ча адары), ол ышкаш бирги категорияның тренерлери Сайзана Куулар, Орлан Куулар (хостуг хүреш), Анжелика Куулар, Шолбан Монгуш (дзюдо) ажылдап турар.
Хостуг хүрешке Россияның делегей чергелиг спорт мастери, Россия Федерациязының күш-культуразының алдарлыг ажылдакчызы Буян Биче-оол – школаның директору.
Школада 310 өөреникчи бар, оларның 130-и хүреш кичээлдеринче барып турар. 2025 чылдың түңнелдери-биле «ЦСКА-Тыва» школазының спортчулары спорттуң олимпийжи хевирлеринге бүгү-российжи маргылдааларга 9 алдын, 13 мөңгүн, 20 хүлер медальды, ол ышкаш регионнар аразының оюннарынга 16 алдын, 8 мөңгүн, 22 хүлер медальды чаалап алганнар.
«ЦСКА-Тыва» бодунуң спортчу белеткел шөлү чок болганындан, өске спортчу объектилерде кичээлдеп турар.