Делегейниң 191 чурттундан 10 муң киржикчини хаара туткан 2026 чылдың делегей чергелиг аныяктар фестивалы Екатеринбург хоорайда болуп эртип турар. Бо улуг хемчээлдиг шуулганда Тывадан төлээлер база киржип турар.
«Тиилелгениң эки турачылары» Бүгү-российжи хөй-ниити шимчээшкининиң регионда салбырының даргазы Азиана Увангур тыва делегацияны удуртуп чоруур. Республикадан делегацияның кежигүннери «Күзелдиң кыйгызы-биле» деп кыйгы-биле эртип турар фестивальдың өөредилге, культура болгаш хөй-ниити программазынга киржип турар.
Фестивальдың уруглар трегинге Тываның киржилгези программада онзагай черни ээлээр. 17 харга чедир уруглар программазынга киржир кылдыр шилиттинген 99 чурттан 1000 аныяк оол санынче Кызылдың школачызы Темир Лопсан кирген. Темир республиканың хөй-ниити амыдыралында киржип, журналистиканы сонуургап, медиаугланыышкынны идепкейлиг сайзырадып турар. Ол Кызылга августа эрткен делегей чергелиг сарыг шажын шуулганга медиа эки турачылааш, делегей чергелиг улуг шөлге ажылдаар арга-дуржулганы алган.
Фестивальга республиканың киржилгези – тыва аныяктарның арга-шинээн, бот-идепкейин, хөгжүлдеже чүткүлүн көргүзүп, ниитилел ужур-дузалыг төлевилелдерге киржир арганы бээр. Делегей чергелиг шөлдер оларга төрээн регионун таныштырып, республикадан дашкаар профессионал болгаш найыралчы харылзааны тудар арганы берип турар.
2026 чылдың делегей чергелиг аныяктар фестивалы сентябрь 11-ден 17-ге чедир Екатеринбург хоорайга болуп эртер. Хемчегни Аныяктар херектериниң талазы-биле федералдыг агентилел база Свердловск облазының Чазаа организастаан. Тываның Аныяктар херектериниң талазы-биле яамызының деткимчези-биле Тываның делегациязы ында киржип турар.