Тываның Баштыңы Бажың-Алаак школазын үндезин септелге планынче киирер даалганы берген

Тываның Баштыңы [id360104045|Владислав Ховалыг] Чөөн-Хемчик кожуунга ажыл албан аайы-биле чорааш, Бажың-Алаак суурнуң школазынга четкен.

«Тывавыстың хөгжүлдезинге улуг үлүг-хуузун дыка хөй алдарлыг кижилер бо школадан үнген» – деп, регионнуң удуртукчузу МАХ-да бодунуң каналынга демдеглээн. Өөредилге чери доозукчуларының бирээзи, Тываның Улустуң чогаалчызы Чылгычы Ондарның адын эдилеп турар. Школада ол алдарлыг культура ажылдакчызының ады-биле адаан музей база бар.

Амгы үеде өөредилге черинде 133 өөреникчи өөренип турар. Владислав Ховалыгның тайылбырлааны-биле алырга, коллектив канчаар чурттап турарын дорт билип алыр дээш школаның башкылар коллективи-биле ужурашкан.

Башкылар Тываның Баштыңы-биле чугаа үезинде өөредилге чериниң мурнунда бөгүнде тургустунган айтырыгларны үлешкеннер. Чижээ, эрткен кыжын класстарга соок турганын чугаалаан. Ындыг байдалдарда шынарлыг өөредилге дугайында чугаалаары берге деп, Владислав Ховалыг чөпшээрешкен.

Школа барыксанчыг болгаш айыыл чок чер болур ужурлуг деп, Тываның Баштыңы демдеглээн. Бо тургустунган байдал чогуур албан чериниң болгаш кожуун чагыргазының ажылында четпестерни көргүзүп турар деп бодалын илереткен.

Бажың-Алаак суурнуң школазын үндезин септелге планынче киирерин республиканың удуртукчузу харыысалгалыг кижилерге дааскан. Биче суурларда уругларның өөредилгезинге болгаш кижизидилгезинге амгы үениң байдалдарын тургузарынче угланган эвээш өөреникчилерлиг школалар тудуунуң чаа программазын башкылар-биле сайгарып чугаалашкан. Ындыг школаларның чаңгыс аайлаан төлевилелдери ажылдап кылдынган, оларның төлевилел-санаашкын документилери күрүне хыналдазын амгы үеде эртип турар.

«Коллектив сырый харылзаалыг, чаңгыс демниг дээрзи илдең. Келир үеде чогаадыкчы ажылы-биле Тываны сайзырадыр оон-даа хөй шылгараңгай доозукчулар ол школадан үнер дээрзинге бүзүрээр мен. Аңаа бүгү-ле таарымчалыг байдалдарны тургузарын кызыдар бис» – деп, Баштың школага четкен соонда түңнээн.