Санкт-Петербургтуң делегей чергелиг экономиктиг шуулган үезинде Тываның Баштыңы Владислав Ховалыг Индияның бизнес-альянзы-биле кады ажылдажылга дугайында меморандумга атты салган.
Ужуражылга үезинде Тываның Баштыңы индий таланы делегей чергелиг IV сарыг шажын шуулганынче чалап, Индияның күрүне телеканалынга интервьюну берип, регионнар аразында культурлуг болгаш ажыл-агыйжы солчулга аргаларын тодараткан. Ол-ла хүн Россияда кыдат сайгарлыкчыларның «Элус» эвилелиниң төлээлери-биле база ужурашкан.
«Бо базым Тываның делегей чергелиг харылзааларын быжыглаарынга чаа аргаларны ажыдып турар. Бисти ниити шажын – буддизм каттыштырып турар, ол ниити сүлде-сүзүүвүс чүдүкчү маршурттарны сайзырадырының бүзүрелдиг үндезини бооп болур» – деп, Владислав Ховалыг MAX-та бодунуң каналынга индий бизнесменнер-биле ужурашкаш, демдеглээн.
Тываның Баштыңы дээрги Сэмми Манодж Котвани-биле кады этнокультурлуг туризмни индий таладан кады ажылдажылганың кол угланыышкыны кылдыр көргенин дыңнаткан. Индий аалчылар сарыг шажынның ыдыктыг черлерин, онзагай көшкүн чаңчылдарны, хөөмей дээш, оон-даа өске чүүлдерни сонуургап турарын ол демдеглээн. Владислав Ховалыг республика-биле таныжып, ооң онзагай культуразын сонуургаар кылдыр бизнес каттыжыышкынның төлээлерин делегей чергелиг IV сарыг шажын шуулганынче чалаан.
Чугаалажыышкыннар үезинде талалар үлетпүр секторунуң айтырыгларынче кичээнгейни угландырган. Тываның минералдыг чиг эт баазазын болбаазырадыр, ооң иштинде хөмүр-даш казып тывар төлевилелдерни сайгарып көрген.
Эрткен чылын Санкт-Петербургтуң делегей чергелиг экономиктиг шуулганының шөлүнге ат салган кады ажылдажылга дугуржулгазы-биле Тыва Республиканың Россияда Кыдат сайгарлыкчыларның «Элус» эвилели -биле ажыл-агыйжы харылзаазы тургустунган. Ийи тала аңгы-аңгы угланыышкынарны база чугаалашкан.
Ол-ла ужуражылга үезинде партнерлар логистикаже кичээнгейни угландырган. Тываны таварыыр Төп Евразия коридору Россия, ылаңгыя Сибирь регионнары-биле экономиктиг харылзааларны хөгжүдеринге эң-не идегелдиг орук деп бот-боттарын билчип турарын олар илереткеннер.
Чер адааның казымалдарын шиңгээдири, чиг эт-септи бүрүнү-биле болбаазырадыры, агроүлетпүр комплекизинге амгы үениң технологияларын киирери база бир тема болган.
«Бистиң партнерларывыстың технологтуг күчү-күжү болгаш арга-дуржулгазы планнаттынган төлевилелдерни чедиишкинниг боттандырарынга дузалаар деп бодап турар бис» – деп, Владислав Ховалыг ужуражылга соонда демдеглээн.
Медээни болгаш чурукту Тываның Чазааның парлалга албанындан алган