Тываның Баштыңының Дээди Хуралга Айыткалы январь 23-те болур

Эртен, январь 23-те, Тываның Баштыңы [id360104045|Владислав Ховалыг] Дээди Хуралга 2025 чылга Айыткалын бээрин социал четкилерде бодунуң блогунда дыңнаткан. Оон аңгыда чаа Айыткалынга мурнады боттандырар угланыышкыннарны айтыр.

Тываның Баштыңының чугаазы-биле алырга, чаа чылдың кол сорулгалары чурттуң Президентизи Владимир Путинниң 2024 чылдың сентябрьда Тываже албан-чоруунуң үезинде берген даалгаларын күүседири-биле холбашкан. Оон аңгыда республика «Кадрлар», «Россияның аныяктары», «Өг-бүле» деп чаа национал төлевилелдерге киржир.

Тыва чазактың ажылының аңгы угланыышкыны “Улусчу программа” апаар. Эрткен чылын регионалдыг парламент соңгулдаларында улуг тиилелгени чедип алган «чаңгыс демнигжилернии»-биле ону тургускан. 2025 чылдың ажыл планнарынче кирген соңгукчуларның даалгаларындан программа үндезилеттинген.

Тываның Баштыңы чаа Айыткалын бээр мурнунда, эрткен чылда даалгаларының күүселдезиниң дугайында илеткелди таныштырар. Ооң 108 пунктузунуң 97-зи долузу-биле күүсеттинген, а артканнары боттанырының чадазында.

Экономика адырында чылдың кол сорулгаларының бирээзи – биче болгаш ортумак сайгарлыкчы чорукту деткиири чедиишкинниг шиитпирлеттинген. Чыл дургузунда сайгарлыкчы адырга 765 чаа эгелээшкиннер каттыжып, 9836 субъект четкен, а бизнеске ажылдап турар кижилерниң саны 11 хуу – 32,8 муңдан 36,5 муң кижи чедир өскен.

Тываның Баштыңының Айыткалында эрткен чылдарда ышкаш, социал политика айтырыгларынга даалгалары элээн кезекти ээлээн. Ылаңгыя социал албан черлери хөй ажы-төлдүг иелерни деткиир системаны чурумче киирген. 2024 чылдан бээр оларның бүрүткелин чурумчуткан, 15 муң хире өг-бүле хөй ажы-төлдүг деп шынзыдылганы алган.

Тываның Баштыңы тускай шериг операциязының киржикчилерин болгаш оларның өг-бүлелерин деткиири мурнады боттандырар кол угланыышкын деп чарлаан. Федералдыг хемчеглерден аңгыда, регион эрге-чагырга органнары боттарының дузаламчы хевирлерин доктааткан. Чижээлээрге, Тываның чазаа аңгы-аңгы пособиелер болгаш чиигелделерден аңгыда, тускай шериг операциязының девискээринге чок болган шериг албан-хүлээлгелиглерниң өг-бүлелери күрүнениң киржилгези-биле туттунган тудугларда чурттаар оран-саваны садып алырда, беш хуу чиигелдени алырын сайгарлыкчылар-биле дугуржуп алган.

Тускай шериг операциязындан халашкан дайынчыларга өөредилгелерни база эде өөредилгелерни организастаан. Балыгланган база инвалид апарган дайынчыларны ажаап-карактаар, эмчи реабилитациязы база психологтуг дуза алырын чурумчудуп, экижиткен. Бо чылын тускай шериг операциязының киржикчилерин болгаш оларның өг-бүлелерин деткиири – кол хемчеглер болур.

Тыва Республиканың Баштыңының Дээди Хуралга (парламентиге) Айыткалын мооң мурнунда чылдарда ышкаш, ам база Владислав Ховалыгның «ВКонтакте» социал четкиде хуу арнынга дорт дамчыдар.

#Тывачазак #Айыткал #ТМГМедээлер #Тыва #Тывамедээ #Тывадыл #Тывамедиагрупп #Тува