Декабрьның 11-де 17:00 шакта «Россия 24» телеканалга Тываның Баштыңының дорт шугуму болуп эртер. «ВКонтакте» социал четкиде Владислав Ховалыгның хууда арынынга база ону дамчыдар. Амгы үеде айтырыгларны чыып, аайлап, оларны ажылдап турар.
«Республиканың хөгжүлдезинге болгаш чурттакчы чоннуң база өг-бүлелерниң амыдыралынга хамаарышкан амгы үениң айтырыгларын аңаа сайгарып чугаалажыр бис. Ол ышкаш чылдың кол түңнелдерин үндүрүп, келир чылдың планнарын тургузар» – деп Тываның Баштыңы Владислав Ховалыг дорт шугумнуң айтырыгларын дыңнаткан.
Тываның регион башкарылгазының төвү шупту кирген дыңнадыгларны болгаш дилеглерни чыып, чаңгыс аайлаш, сайгарып көөрүн Владислав Ховалыг дыңнаткан.
Республиканың чурттакчылары Тываның Баштыңы-биле дорт шугумче айтырыгларын тускай сервистер таварыштыр чорударын сагындыраал:
- күрүне ачы-дузалары порталда удур харылзаа шөлүнүң бо айтыында (pos.gosuslugi.ru/lkp/direct...)
- тускай чат-бот дузазы-биле (forms.yandex.ru/u/68feecd7...).
Регион башкарылгазының төвүнүң медээзи-биле алырга, транспорт инфратургузуун, чуртталга тудуун хөгжүдериниң, корум-чурум тударының айтырыглары, хамаатыларның чиигелделиг бөлүктеринге күрүне деткимчезиниң хемчеглерин көргүзериниң айтырыглары хөйү-биле кирген.
Эрткен чылын Тываның Баштыңының дорт шугумунче чурттакчылардан 500 хире айтырыглар кирген, оларның хөй кезии – 370 хирези дорт харылзаа эгелээринге чедир аңгы-аңгы каналдар таварыштыр келген. Республиканың удуртукчузу ийи шак үргүлчүлээн дамчыдылгада эң-не чидиг айтырыгларга харыыларны берген.