2026 чылдың январь 1-ден эгелеп республикада төрүттүнген 74 дун чаштың өг-бүлелери «Тываның чаш төлүнге» тускай белек түүн алганнар. 10 муң хире рубль өртектиг комплектиде чаа төрүттүнген өпеяга чугула херек арыг-силиг херекселдери, идик-хеп комплектизи база бичии орун бар.
«Ада-иелер белекте кирген орунну баш бурунгаар ап алгаш, авазы биле өпеязын үндүр бижииринге чедир бажыңынга чыып, белеткеп ап болур» – деп, ТР-ниң Кадык камгалал яамызы дыңнаткан.
Тываның Баштыңы Владислав Ховалыгның Айыткалын күүседири-биле «Тываның чаш төлүнге» социал төлевилелди эгелээн. Ол аныяк ада-иелерни деткип, чаштарның чаагай чоруун экижидер ужурлуг. 2025 чылда дун төлү төрүттүнген 1288 өг-бүле белектерни алган.
Социал төлевилелге киржип турар дун чаштарлыг аныяк иелер чаа төрүттүнген уругларын аңгы орунга чыттырып өөредир ужурлуг. Чаш төлдүң кадыкшылын болгаш амы-тынын камгалаарынче ол хемчег угланган. Эмчилерниң демдеглээни-биле алырга, чаш төл аңгы удуурга ие кижиге дыштыг болгаш эки удуур, а эң кол чүүл – уругга айыыл чок чорукту хандырар.