Тываның девискээринге өртке удур онза чурум июнь 14-ке чедир күштүг болур

Апрель айда киирген өртке удур онза чурумну регионалдыг чазактың шиитпири-биле май 25-те узаткан. Май 21-де чазак хуралынга ол дугайында доктаалды хүлээп алган. Документ езугаар тускай чурум июнь 14-ке чедир күштүг болур. Ынчангаш арга-арыгже кирерин республиканың чурттакчыларынга болгаш машиналарга кызыгаарлаан. Ол хемчеглерниң кол сорулгазы – арга-арыгга өртке удур айыыл чок чорукту хандырары.

Арга-арыгже чүгле тускай эрттирилгелер-биле кирерин чөпшээреп турар, ону тус черниң арга-арыг черлеринден азы республиканың Арга-арыг болгаш бойдус курлавырларының яамызындан ап болур. Одаг кыпсыры, оът-сиген болгаш бок өрттедири, ажык отту, ооң иштинде эът ыштаар чүүлдер ажыглаары хоруглуг болуп арткан.

Арга-арыг өрттерин өжүрериниң каттышкан плананче кирген арга-арыг ажыл-агый черлериниң, «Азас» болгаш «Убсу-Нур ыйгылаажы» федералдыг камгалалдыг черлерниң, ол ышкаш аварийлиг-камгалал каттыжыышкыннарының база өске-даа организацияларның күштери болгаш дериг-херекселдери кезээде белен турар байдалда.

Өртке удур айыыл чок чоруктуң дүрүмнерин хажытканы дээш административтиг торгаалдарны онаап болур: хуу кижилерге – 40 муңдан 50 муң рубль чедир, албан-дужаалдыг кижилерге – 60 муңдан 90 муң рубль чедир, а юридиктиг черлерге – 600 муңдан сая рубль чедир.

Тывада өрт айыылының сезону март 31-де эгелээн. Ол хүнден бээр арга-арыгларга ниитизи-биле 5172,50 гектар черни ээлээн 39 арга-арыг өрттери демдеглеттинген, оларның 32-зи кижилерниң буруузу-биле болган. Оон аңгыда 439,01 гектар шөлге 22 хову өрттери демдеглеттинген, оларның 11-и чурттакчылыг черлерден беш километр чедир девискээрген болган. Билдинмес кижилерниң от-биле серемчилел чок болганындан, хову өрттери (19 таварылга) болган.

Республикада амгы үеде хып чыдар арга-арыг болгаш хову өрттери чок. Ындыг болзажок, эрткен неделяда Бии-Хем кожуунда Сесерлиг суурнуң соңгу-барыын талазынче 8-ки километринге бир арга өрттенген. 0,068 гектар черде хыпкан өрттү майның 23-те илереткен болгаш, ол-ла дораан өжүрген.