Тываның эрге-чагыргазы «Маадыр Ие» деп российжи атка төлептиг болган херээжен улуска, ол ышкаш «Эрес-дидим чорук» ордени-биле үш дакпыр шаңнаткан кижилерге социал деткимчениң немелде хемчеглерин доктааткан. Оларны күрүне азы муниципалдыг өнчүден халас чер участоктарын алыр эргелиг хамаатылар даңзызынче киирген.
Тываның Чазаа «Чер дугайында» регионалдыг хоойлуже чогуур өскерилгелерни киирип, бадылаан. Бир эвес халас чер участогу алыр эргелиг кижи чок болган таварылгада, ону ооң чоок улузу – өөнүң ишти, ажы-төлү болгаш ада-иези ап болурун айыткан эдилгени кылган.
Эдилгелерни ажылдап кылган Тываның Күш-ажыл болгаш социал хөгжүлде яамызының дыңнатканы-биле алырга, кииртинген өскертилгелер күрүнеге болгаш ниитилелге шылгараңгай ачы-хавыяазын көргүскен чамдык хамаатыларны деткип, социал камгалалдың чогуур деңнелин хандырар ужурлуг. Ынчалдыр «Маадыр Ие» деп атка хамаарыштыр юридиктиг эрге-хоойлу чөрүлдээзи шиитпирлеттинген.
«Чер дугайында» хоойлунуң эрги редакциязында, чүгле совет үеде азы Тываның Баштыңының чарлыы-биле ук атка төлептиг болган херээжен улус халас чер участогун алыр эргелиг турган. Россияның Президентизиниң 2022 чылда тургускан ол-ла аттың эдилекчилери амдыгаа чедир ол даңзыже кирбээн. Бо чүүл ам шиитпирлеттинген.
Эрес-дидим чорук ордениниң үш дакпыр эдилекчилерин ачы-дуза алыкчыларының даңзызынче киирери база чөптүг деп төлевилелдиң авторлары санап турар. Бо шаңналды амы-тынын артынга каггаш, дайынчы маадырлыг чоруктарны кылган кижилерге тыпсырын сагындыраал. А бир эвес ол кижи амы-тынын бодавайн маадырлыг чоруктарны кылганы дээш үш катап орденни алган болза, чүгле күрүнениң шылгарал болгаш хүндүткел демдектеринге эвес, а тускай деткимчеге база төлептиг болур.