Ада-чурттуң Улуг дайынынга Тиилелгениң 80 чылдаан оюнда Тываның найысылалынга, республиканың ат-сураглыг чурттакчылары, Шумов алышкыларның маадырлыг чоруунга тураскааткан сесерликти ажыдар. Ооң девискээринге тоолчургу фронтучуларга тураскаалды тургузуп, а шөлдү Шумов алышкыларның ады-биле адаар.
Тываның Баштыңы Владислав Ховалыг тураскаалды ноябрь эгезинде ажыдар ужурлуг деп дыңнаткан.
Эрткен чылын «Таарымчалыг хоорай хүрээлеңин тургузары» федералдыг программаның күүселдези-биле сесерликтиң девискээрин чаагайжытканын сагындыраал.
Хоорайның чурттакчыларынга болгаш найысылалдың аалчыларынга сесерликке аянныг дыштанырынга байдалдарны тургускан: чырыкты шөйген, шөлдү чаагайжыткан, автоматчыткан суггарылга системазын киирип, кижи кылаштаар черлерни брусчатка-биле шыпкан. Амгы үеде тураскаалды тургузар таваан белеткеп турар. Тураскаалды быжыг граниттен кылган.
Москваның чурукчулар эвилелиниң кежигүнү, российжи скульптор Виталий Шанов минометчу Шумов алышкыларга тураскаалдың төлевилелин ажылдап кылган. «Российжи шериг-төөгү ниитилели» российжи ниитилел-күрүне организациязының организастааны конкурска ооң дөзевилел ажылы эң эки тураскаал кылдыр тиилээн. Тываның чурттакчылары мастерниң чогаадыкчы ажылы-биле эки таныш: ол – Кызыл хоорайда Щетинкин-Кравченко кудумчузунда тургускан «Кызыл кош» тураскаал скульптураның автору.
