Улуг Тиилелге хүнүнге тураскааткан «Тиилелгениң соңгалары» бүгү-российжи акция чыл санында эртип турар. Тываның өөреникчилери идепкейлиг база ында киржип турарын республиканың немелде өөредилге сайзырадыр төвү дыңнаткан.
«Акция 2020 чылда, пандемия үезинде эгелээш, бүгү Россияның девискээринде тарай берген. 2023 чылда Россияның Чырыдыышкын яамызының хайгааралы-биле эрткен, а 2024 чылдан бээр аңаа күзелдиг кижи бүрүзү киржип болур апарган. «Тиилелгениң соңгалары» акцияның чуруктарын «Баштайгыларның шимчээшкини» уруглар болгаш аныяктарның бүгү-российжи шимчээшкининиң сайтызындан ап болур.
Акцияның кол сорулгазы – ада-өгбелервистиң маадырлыг чоруунуң дугайында төөгүлүг сактыышкыннарны кадагалап, аныяк салгалдың ортузунга ниити үнелелдерни каттыштырары. Бистиң школавыстың өөреникчилери болгаш башкылары соңгаларны Тиилелгениң демдектери-биле каастап турар. Ол чүгле хүндүткелдиң демдээ эвес, а маадырларга сактыышкын болгаш четтиргенин илередир арга болур» – деп, Кызылдың 4 дугаар школазының 7 «а» клазының өөреникчизи акция дугайында бижээн.