Совет Тываның 5 чылы аттыг стадионга суд системазының ажылдакчылары «Күш-ажылга болгаш камгалалга белен» бүгү-российжи күш-культура-спорт комплекизиниң нормативтерин дужааганын шүүгү чери дыңнаткан.
Россияның шииткекчилер каттыжыышкынының Тывада салбырының даргазы Хээлиг Түлүш спортчу хемчегни ажыдып, киржикчилерге чедиишкиннерни күзээн.
Чалаткан аалчылар – Россияның Маадыры Чалым Чүлдүм-оол, Сирияда дайынчы хөделиишкиннерниң база тускай шериг операциязының киржикчизи, Тываның Дээди Судунуң ажылдакчызы Эрес Шивидек, Тываның спорт сайыдының оралакчызы Байлак Амыртаа.
Агаар-бойдус сериин-даа болза ТР-ниң Дээди, Арбитраж, Кызылдың хоорай, район база эптештирилге судтарының шииткекчилери болгаш аппарат ажылдакчылары, Суд департамент эргелелиниң төлээлери, хүндүлүг халажылгада шииткекчилер болгаш оларның өг-бүлелериниң кежигүннери киришкен.
Арбитраж судунуң ажылдакчызы, спорт мастеринге кандидат Орлан Салчак-биле сула шимчээшкин соонда, киржикчилер нормативтерин дужаап кирипкен.
Күш-культура-спорт комплекизиниң нормативтерин 120 кижи дугаажан. Оларның 15-жи чалыы киржикчи. Бүрүткеткен улустуң ниити саны – 180 ашкан. Арткан киржикчилер июнь айда нормативтерни немелде хүнде дужаарын уламчылаар.
Россияның шииткекчилер каттыжыышкынының Тывада салбыры спортчу хемчегни Улуг Тиилелге хүнүнге тураскаадып эрттирген.
Нормативтерни чедиишкинниг дужааган суд системазының ажылдакчыларынга база оларның өг-бүлелеринге үндүрүг чиигелделери, дээди болгаш ортумак өөредилге черлеринче дужаап кирерде немелде баллдар көрдүнген.
Тываның шииткекчилер ниитилежилгези «Күш-ажылга болгаш камгалалга белен» бүгү-российжи күш-культура-спорт комплекизиниң нормативтерин күүседиринге идепкейлиг киришкен.