Тываның Чазааның 2025 чылда кылып чоруткан ажылының отчеттуг хуралын ажылчын бөлүктер Улуг-Хемниң сумуларга эрттирип, чондан кирген айтырыгларга харыылап, санал-оналын хүлээп алганын чагырга чери дыңнаткан.
ТР-ниң Чазак даргазының оралакчызы Орлан Сарыглар база адыр аайы-биле яамылар сайыттары чазак деңнелинде айтырыгларга харыылап, чоннуң санал-оналын хүлээп алган. Кожуун деңнелинге салдынган айтырыгларга чагырга даргазы Эрес Мандан-оол харыылаан.
Шагаан-Арыгга болган хуралга уругларның уран чүүл школазының башкылары чаа тудуп турар оран-сава дээш Тываның Чазаанга четтиргенин илередип, фортепиано, баян башкылары херегин, кадрлар белеткээриниң дугайында саналды киирген.
Ол ышкаш гимназияда өөреникчилер ийи ээлчегде өөренип турар болгаш немелде кичээлдер эрттирер класстар чогундан уруглар билиглерден чыдып каап турарын директору дыңнадып, чаа школа тударын дилээн. Оон ыңай чондан хоорайның чунар-бажың септелгези, Шагаан-Арыгның суг арыглаар системаның септелгези, кадрлар белеткели, тускай шериг операциязының киржикчилериниң өг-бүлелеринге үлээр картофель, эмчилээрде электроннуг оочур улуг улуска эпчок болуп турарын дээш өске-даа айтырыгларны шиитпирлеп, чурумчударын дилээннер.
Шагаан-Арыгның суг арыглаар инженер-техниктиг системазының септелгезин чорударынга 1,6 млрд. рубль херек. Бо чылын септелге ажылдарын чорударын чазак деңнелинде чугаалашканын дыңнаткан. Төп одалга чериниң-даа, сугканалдың-даа септелге ажылдары чоннуң төлевиринден кол хамааржыр, ынчангаш чылдылга дээш, суг дээш өрелиг чурттакчы чонну өрелерин төлеп алырынче чагырга даргазы кыйгырган.
Тываның Чазааның 2025 чылда кылып чоруткан ажылынга Улуг-Хем кожууннуң чурттакчы чону эки үнелелди берген.