«Ада-чурт камгалакчылары» күрүне фондузунуң Тывада салбырының тускай мергежилдиглери Улуг-Хем кожуунда социал координаторлар Валерия Тулушке, Алдын-Херел Дамыймаага, Айдан Доржукайга методиктиг дузаны чедиргенин чагырга чери дыңнаткан.
Күрүне фондузунуң төлээлери дуза дилеп келген дайынчы хөделиишкиннер хоочуннарынга, кадыкшылының байдалы-биле харык-шинээ кызыгаарлыг база ис чок читкен дайынчыларга, оларның өг-бүлелеринге кандыг дуза көргүзүп болурун тайылбырлаан.
Ол ышкаш харык-шинээ кызыгаарлыг дайынчы хөделиишкиннер хоочуннарын чаа байдалга чаңчыктырар аргаларга, оларга протезтер дээш оон-даа өске техниктиг дериг-херекселдер, тренажерлар, тускай идик-хеп, автомашина алырынга, чурттап турар бажың-балгадынга «Угаанныг бажың» системазын кииреринче чагыгларны шын долдурарын өөреткен.
«Ада-чурт камгалакчылары» күрүне фондузунуң Тывада салбыры кожууннарда ажылдап турар социал координаторларга методиктиг дузаны доктаамал чедирип турар.