Тыва үндезин культура төвүнде V республика чергелиг Доңгак Окаанчык аттыг ыяштан чазаан биче хевирниң скульптура мөөрейи болуп турар.
Төп ус-шеверниң дугайында таныштырган. Доңгак Чамаа оглу Окаанчык Улуг-Хем кожууннуң Көк-Чыраа сумузунуң Элезин-Бажы деп черге 1896 чылдың июль 15-те тѳрүттүнген. Ооң ачазы кончуг шевер кижи чораан. Бичиизинден тура ачазындан ыяштың чазаар аргаларын болгаш чайгаар бүткен будуктарны ажыглаарын шиңгээдип алган.
Доңгак Окаанчык бодунуң үезинде моол бижикти билир эртем-билиглиг кижилерниң бирээзи чораан. 1920 чылдарда чаа тургустунган Тыва Арат Республиканың саң-хөө яамызынга, Чазакка, Улуг-Хем кожуунга бижээчи болуп ажылдап чораан. 1943 чылда буруу чокка кеземче хемчээнге (репрессияга) таварышкаш, Каа-Хем кожуунче шөлүткен турган. 1957 чылда ооң адын агарткан.
1950 чылдардан эгелээш Доңгак Окаанчык делгелгелерге киржип эгелээн. Ооң ыяштан скульптуралары болгаш тыва национал хөгжүм херекселдери барган черинге бедик үнелелди ап чораан. Ооң ыяштан болгаш чонар-даштан кылган ажылдары Тываның, Санкт-Петербург, Москва хоорайларның музейлеринде кадагалаттынып турар.
Доңгак Окаанчыктың чогаадыкчы ажылы ооң бедик мергежилин бадыткап, амгы үеде ыяш-даа, даш-даа чазаныкчыларынга үлегер болуп чоруур. Бо чылын ус-шеверниң төрүттүнгенинден бээр 130 чыл болган оюн демдеглеп турар.
