Ачы-дуза чедирилгези уламчылап турар

Тывадан долу эвес мөөңнээшкинче кыйгырткан хамаатыларның өг-бүлелеринге ачы-дуза чедирилгези уламчылап турар.

Сүт-Хөл кожууннуң төвү Суг-Аксы сумузунуң эки турачылары өг-бүлелерге аъш-чем аймаан чедирген. Ол ышкаш кожуунда мөөңнээшкинче кыйгыртканнарның өг-бүлелеринге дуза кадар штаб Суг-Аксы сумузунда “Дииңчигеш” уруглар садының ясли бөлүүнче бир хар алды айлыг чашты тургускан.

Республикада долу эвес мөөңнээшкинче кыйгырткан хамаатыларның чээрби ажыг ажы-төлүнге уруглар садтарында олуттарны аңгылаан. Ажыл ам-даа уламчылаар.

ТР-ниң Күш-ажыл болгаш социал политика яамызының дыңнадып турары-биле алырга, долу эвес мөөңнээшкинче кыйгырткан хамаатының өг-бүлезинге бир шоодай далган, ийи шоодай картофель, бир баш шээр мал көрдүнен.

Амгы үеде 538 өг-бүлеге аъш-чем аймаан, 731 өг-бүлеге далганны, 617 өг-бүлеге картофельди, 731 өг-бүлеге шээр малды дамчыткан.