ВОЛОНТЁР БОЛУР МЕН

    0
    10

    Экии, ынак солунум «Сылдысчыгаш»!
    Улуг-Хем кожууннуң Торгалыг сумузунуң 7-ги классчызы мен. Суурувус долгандыр даглыг, тайга черде турар. Удавас даг эдээнден чес­тек-каттаар үе келир. Өг-бүлем 8 кижи, шупту уруглар бис, эң-не хеймери мен. Авам-ачам — 18 уйнуктуң ынак кырган ада-иези.
    Бот-аңгыланыышкын үезинде интернет таварыштыр өөрениринден аңгыда, угбаларымга, ада-иемге дузалажып турар мен. Эртенги шакта инектерни саарга, бызаазын тыртыжып берип, бызаалар кадарар. Кежээ хойлар кирип кээрге, хураганын ытчыр. Кажаа иштин аштаар, хаван чемгерер ажылдарлыг мен. Улуг угбаларым уруглары-биле чажыттар болгаш, шупту ажылдарны кады кылып кааптар бис. Олар боттарының бажыңнарындан халчып келирлер. Хөй угбаларлыг, дуңмаларлыг болганымга өөрүүр мен – найыралдыг, эжишкилер бис.
    Улуг угбамдан бичиизи Айкуша Валерьевна – Торгалыгның көдээ культура одааның удуртукчузу. Угбам коллективи-биле волонтёрлап ажылдап турар. Олар хөй ажы-төлдүг өг-бүлелерге, улуг назылыгларга дузалажырлар. Аъш-чемни чагыг езугаар кожуун төвүнден садып эккеп берип, бот-аңгыланыышкын үезинде бодун канчаар алдынарын тайылбыр­лап берип дээш, оон-даа өске дузаны көргүзүп турарлар.
    Кандыг-даа ажык-кончаа чокка кижилерге дузалажыр улус – волонтёрлар дээрзин угбам чугаалаан. Күзелдиг кижи бүрүзү волонтёр бооп болур. Мен база өзүп келгеш, волонтёр болур мен.

    Хенче ЧАМЫЯН, Торгалыг школазының 7-ги классчызы.

    #Победа75#Побкда75_Тыва#Тиилелгениң75чылынга
    #Сылдысчыгаш_солуну

    Реклама