Коронавирус халдавырының чаа хевири бүгү делегейде нарын байдалды болдурган. Бо берге үеде республиканың чамдык сайгарлыкчылары эмчилерни деткиирин шиитпирлээн деп @tmgnews17 дыңнадып тур.
Республиканың эмнелгелеринде хынадып чыдар кижилер эмчилерниң доктаамал хайгааралында. Ынчангаш эмчилерниң дүштээр, садыгдан аъш-чем садып алыр үези чок. Бо бүгүнү барымдаалааш, ыраккы Мөңгүн-Тайга кожууннуң сайгарлыкчызы республиканың халдавырлыг аарыглар эмнелгезиниң ажылдакчыларынга манчы, буузаны эккеп, дамчыткан. «Бис эмчилерни шыдаар аргавыс – хайындырарынга белен чем-биле деткиирин шиитпирледивис. Эмчилерниң ажылын бичии-даа бол чиигедири-биле, чаңгыс чер-чурттугларывысты республикада чарлаан карантинниг хемчеглерни сагып, кайнаар-даа үнмейн, бажыңынга олурарын кыйгырар-дыр бис» – деп, ол чугаалаан.
Камгалал маскалары чедишпес үеде, республиканың чурттакчыларынга дуза чедирер дээш, энерел сеткилдиглер маскаларны боттары даарап, халас үлеп эгелээн. Улуг, биче чон маскаларны эмнелгелерге болгаш бажыңнарында даарап турар.
Тываның элээди инспекторлар шимчээшкини база кыдыынга артпаан. Школачылар ада-иези-биле хүннүң-не ажылдап үнер ужурлуг улуска камгалал маскаларны даарап кирипкен. «Бо нарын үеде ажыктыг болуп, дузаны чедирер күзелдиг бис. Кажан арыг-силиг болгаш чурум турда, бис шупту шаптараазыннарны ажып эрте бээр бис» – деп, уруглар демдеглээн.
Үстүнде үлегер-чижек, коронавирус деп халдавыр, чурттакчы чонну энерел чоруу-биле демнештирип турарын көргүзүп турар. Интернет делгемнеринде Тывада камгалал маскаларны даарааш, халас үлеп турар кижилер дугайында хөй медээлер көстүп турары өөрүнчүг.
