«Шивилиг» постузунга чаңгыс хүн

«Шивилиг» постузунга күштелдилген контроль март айда-ла эгелээн. Хүннүң-не муң ажыг автомашиналарны хынап четтигип турган. Тывага онза чурумну кииргенинден бээр республикаже хонукта-ла ортумаа-биле 250 автомашина, а ол дээрге 500 хире кижи кирген. Чолаачылардан документилерин көргүзерин, шупту пассажирлерниң эъдиниң изиин хынап, эмчилер кижи бүрүзү-биле анкеталаашкынны чорудуп турар. 

Коронавирус талазы-биле чогумчалыг эвес регионнардан келген хамаатыларга 14 хонуктуң дургузунда бот-хоргадалдың дугайында доктаалдарны бижип берип турар. Кээп турарларның хөй нуруузу ындыг хемчеглерни билиишкинниг хүлээп ап турар. Ооң дугайында Кызыл хоорай чурттуг Светлана Викторовна @tmgnews17 корреспондентизи-биле бодунуң бодалын үлешкен. Бо херээжен өг-бүлези-биле кады кожавыста Абакан хоорайже үнүп чораан. Ээп чанып олура, “Шивилиг” эрттирилге пунктузунга чүгле мага-боттуң температуразын хынаар, айтырыглар салыр деп бодаан. “Кыдыындан көөрге, чоруттунуп турар хемчеглерниң хөйү хөлчок ышкаш көстүр. А херек кырында эмчилер болгаш полиция ажылдакчылары ону чорудар хүлээлгелиглер. Чүгле шак мынчаар, бистиң Тывавыска коронавирустуг инфекцияның нептерелин доктаадып болур бис” – деп, Светлана чугаалап, 14 хонуктуң бот-хоргадалының негелделерин күүседип, бажыңдан үнмес мен деп бүзүреткен. 

Ажылдап болур-дур 

Апрель 15-те 9-тан 12 шакка чедир эрттирилге пунктузун таварыштыр 18 автомобиль Тываның найысылалынче кирген. Орук-таңныыл албанының ажылдакчылары чиик-даа, чүък-даа машаиналарын чаңгыс аай хынап турар. Эмчилер 40 кижини шинчээн, оларның аразында ийи студентиниң эъдиниң изии 37 градус болган. Тываның Росхереглелхайгаарал Эргелелиниң постуга дежурныйлап турган кол специализи Хамида Ооржактың чугаалааны-биле алырга, беш кижини хайгааралга алган, ийи студентини болгаш олар-биле харылзажып турган үш кижини. «Медицина шинчилелдерин чорудары-биле бис хамаатыларның сан-медээлерин республиканың халдавырлыг аарыглар эмнелгезинче чоргустувус. Оларны дүрген дуза бригадазы болгаш полиция ажылдакчылары үдеп чорупкан. Оларның дугайында медээ-дыңнадыгларны республиканың оперативтиг штавынче дамчыткан” – деп, специалист дыңнаткан. 

Санитар-карантин пунктузунда хынаашкын хемчеглери дүн-хүн чок чоруп турар. Ол бүгү хемчеглерни чорударынга көрдүнген улуг майгыннарны ында тиккен.