Россияның камгалал сайыдының оралакчызы генерал-полковник Александр Фомин май 16-да Стамбулга "1000 кижиге 1000 кижи" деп саналга солчулгазының дугуржулгазы долузу-биле күүсеттингенин дыңнаткан, ооң түңнелинде украин туттуруушкундан 880 российжи шериг болгаш 120 тайбың чурттакчы эглип чанып келген. Оларның аразында бистиң дөрт чаңгыс чер чурттугларывыс: Роберт Самбуджук, Арбай-оол Хомушку, Андриян Шивит-оол база Буян Ховалыг бар.
Александр Фомин май 25-те, Киевтиң хыналдазында девискээрден 303 российжи шеригниң ам-даа ээп келирин дыңнаткан. Оларга херек бүгү дузаны көргүзүп турар. Ооң орнунга Украинаның Чепсектиг Күштериниң туттурган 303 дайынчызын дамчыткан.
– Амгы үеде Россияның шериг албан-хүлээлгелиглери Беларусь Республиканың девискээринде, Россияже чанарынга белеткенип турар. Ынчалдыр үш хонуктуң дургузунда, майның 23, 24 база 25 хүннеринде, 880 шериг албан-хүлээлгелиг база 120 тайбың хамааты чанып келген. Россияның саналдааны езугаар туттурганнарның улуг хемчээлдиг солчулгазы – украин кризисти тайбың арга-биле шиитпирлээринге таарымчалыг байдалды тургузарынга идегеп турар – деп, генерал-полковник чугаалаан.
Россияның камгалал сайыдының оралакчызы Белоруссия Республиканың эрге-чагыргазынга бүгү талалыг дузазы болгаш деткимчези дээш өөрүп четтиргенин аңгы илереткен.
Туттурган шериглер-биле кады украин шериглерниң эжелеп алганы Курск облазының тайбың чурттакчылары база чанып келген.
Россияның Камгалал яамызының эмнелге албан черлеринге российжи шериглер база тайбың чурттакчылар эмнээшкинни база реабилитацияны алыр. Дайзынның девискээринде арткан чаңгыс чер чурттугларывысты эгидер талазы-биле ажылдар уламчылап турар. Россияның Камгалал яамызының чогуур албан черлериниң тускай мергежилдиглери айтырыгларны шиитпирлээри-биле хаара туттунган.
