Тываның Баштыңы Владислав Ховалыг «Енисей Сибирин хөгжүдер корпорация» автономнуг коммерцияга хамаарышпас организацияның чиңгине директору Ольга Коростелева-биле ажыл-агыйжы ужуражылганы эрттирген.
Республика девискээринге автономнуг коммерцияга хамаарышпас организацияның ажыл-чорудулгазының хемчеглер планы-биле (“орук картазы”) 2025 чылда кады кылыр ажылының кол угланыышкыннарын ийи тала сайгарып чугаалашкан.
– Тывада алыс кедилиг ажыктыг мөөң чыдымнарже инвесторларны хаара тударынче, “Хандагайты-Боршо” автомобиль эрттирилге пунктузунуң чоогунга тускай экономиктиг девискээрни база садыг-логистика терминалын тургузар төлевилелдерже киржикчилерни хаара тударынче кол күжениишкиннерни угландырар бис. Енисей Сибириниң бараан хандырыкчыларының болгаш керээ чарыкчыларның даңзызынче республиканың биче болгаш ортумак сайгарлыкчы чоруун киирериниң айтырыы-биле ажылдаар бис – деп, Владислав Ховалыг ужуражылганың түңнелин дыңнаткан.
Ольга Коростелева Корпорацияны 2025 чылдың февральда удуртуп эгелээн. Ол үеге чедир Красноярск крайның даштыкы харылзаалар эргелелин удуртуп турган. Чаа албан-дужаалга соңгуткан соонда, Тывада албан езузу-биле бир дугаар келген.
Автономнуг коммерцияга хамаарышпас организацияның чиңгине директору Кызылда «Тыва: Агроинвест-2025» шуулганынга киржип, «Енисей Сибири» комплекстиг инвестиция төлевилелиниң, ооң санында Тываның девискээринде база, кол эгелээшкиннерин таныштырган.
«Россия, Моол база Кыдат аразынга транспорт коридорун тургузары – чугула төлевилелдерниң бирээзи. Ол Транссибирь база Байкал-Амур магистралының, ол ышкаш Ыраккы Чөөн чүктүң далай порттарының чүъгүн эвээжедип, Россияның Кыдат-биле даштыкы бараан садыг-сайгарылгазын көвүдедиринге үндезинни тургузар. Ол чүүл Енисей Сибириниң регионнарының экономиктиктиг хөгжүлдезинге эки салдарны бээр» – деп, Ольга Коростелева демдеглээн.
«Енисей Сибири» комплекстиг инвестиция төлевилели үш регион: Красноярск край, Хакас Республика, Тыва Республиканың социал-экономиктиг хөгжүлдезинче угланган. Субъектилер баштыңнарының идип үндүрген төлевилели Россияның Президентизинден болгаш Чазаандан деткимчени алган. 2018 чылда Красноярскиниң экономиктиг шуулганының үезинде, төлевилел күүселдези-биле кады ажылдажылга дугайында дугуржулгага ат салдынган.
