2025 чылда Тывада үндезин септелге төлевири Сибирьде эң эвээш болуп арткан

Келир чылын Тываның хөй квартираларлыг бажыңнарының ниити өнчүзүнге үндезин септелге дээш ай санының төлевири чуртта баш бурунгаар инфляцияны көрүп, немежир. Республиканың чазаа дадывырның эң эвээш хемчээлин бадылаан.

Лифт чок бажыңнар чурттакчыларынга, ол ышкаш лифтилиг бажыңнарның бирги каъттарында чурттап турар кижилерге төлевир январь 1-ден ниити шөлдүң бир дөрбелчин метринге 7,77 рубль болур. Хөй квартиралыг, лифтилиг бажыңнарның бирги каъттарда квартираларның ээлеринден аңгыда, чурттакчылар үндезин септелге фондузунче дөрбелчин метр бүрүзүнге 7,88 рубльди төлээр.

Бо хүнде лифт чок болгаш лифтилиг бажыңнарның үндезин септелгези дээш төлевирниң кудуку тариви айда дөрбелчин метр дээш 7,34 база 7,44 рубль. Кожа регионнарда январьдан эгелеп төлээр дадывырларга көөрде, шоолуг эвес – 34 биле 44 копеекке өстүрген. Чижээ, Красноярск крайда кудуку өртек 10,09 рубльдан эгелээр. Бурятияда бажыңның хевиринден көрүп, өртектер 10,10 рубльдан 15,23 рубль чедир өзер. Алтай Республикада дадывыр метрде 13,23 рубль болза, Новосибирск облазында – 19,29, Кемеровода – 12,28 рубль чедер.

Ставканы өстүргени капитал септелге программазын боттандырарынга боттуг хереглелден каш катап эвээш деп, хөй аалдыг бажыңнарның регионалдыг капитал септелге фондузу тайылбырлаан. Сөөлгү чылдарда Сибирь федералдыг округда лидерлер санынче кирген Тывага дадывыр хемчээлин ынчаар өстүрери ажылдарның ниити хемчээлин улгаттырарынга болгаш септелге темпизин шапкынчыдарынга салдарлыг. 2023 чылда республикада хөй аалдыг 46 бажыңны септээн, 2024 чылда ол сан 48 четкен. Ооң-биле чергелештир регионда дадывыр чыылдазы 83 хуу чедир көвүдээн.

2025 чылда хөй аалдыг 35 бажыңны септээри көрдүнген. 2014 чылдан эгелээш 2043 чылда доостур үндезин септелге программазы-биле тос муниципалдыг тургузугда хөй аалдыг 482 бажыңны септеп-селээн. Программа күүселдези-биле хөй кезиинде Кызыл хоорайда – 346, Шагаан-Арыгда – 60, Ак-Довуракта – 44 хөй аалдыг бажың септеттинер.