Тывада хан-дамыр болгаш чүрек аарыг кижилерни халас эмнер-биле хандырары көвүдээн. Тываның Кадык камгалал яамызының дыңнатканы-биле алырга, 2026 чылдың бирги чартыында 1605 аарыг кижи ол чиигелдени ажыглаан – 2024 чылда база ол хире кижи алган.
Оларга ниитизи-биле 13,5 сая рубльге 8,5 муң ажыг, азы аарыг кижи бүрүзүнге ортумаа-биле беш рецептини бижээн.
«Узун болгаш идепкейлиг назын» национал төлевилелдиң «Чүрек-дамыр аарыгларынга удур демисел» федералдыг программазы-биле республикада бо дузаның хемчээли улгатканы халас эм алыкчыларының санын көвүдеткен.
2024 чылда Тывага чүрек эмнеринге 20 сая рубльден эвээш акша-хөреңги көрдүнген болза, бо чылда субсидияның түңү 25 350 200 рубль болган.
Амбулаторлуг эмнээшкинниң халас эмнерин чартыктаан болгаш чүрек-дамыр системазы аарыг кижилерге берип турар. Аарыгны тодарадып салган азы кезиишкин кылган хүнден эгелеп ийи чыл дургузунда ол чиигелде күштүг болур.
Тывада чүрек-дамыр аарыг кижилерге бо дуза чугула херек. Шупту чок болган кижилерниң 33,2 хуузу чүрек-дамыр аарыгларындан болуп турар. А ындыг аарыг кижилер саны көвүдеп турар: 2019 чылда 24,2 муң кижи диспансер даңзызында турган болза, ам оларның саны 33 муң ажа берген.
