Тываның эрге-чагыргазы 2030 чылга чедир даштыкы экономиктиг ажыл-чорудулганы хөгжүдер талазы-биле чаартынган стратегияны бадылаан.
Тываның Баштыңы Владислав Ховалыгның башкарылгазы-биле эрткен регионнар аразының, делегейниң, кызыгаар чоогунуң кады ажылдажылга болгаш даштыкы экономиктиг харылзаалар талазы-биле координация чөвүлелиниң хуралынга чурттар аразының кады ажылдажылгазының, экспортту хөгжүдериниң болгаш инвестицияларны хаара тударының мурнады боттандырар угланыышкыннарын тодараткан документини сайгарып көрген.
Чаа стратегия амгы экономиктиг байдалдарга дүүштүр бизнеске немелде оруктарны ажыдып турар. Ол регионнуң экспорт күчүзүн калбартыр, тыва бараан бүдүрүкчүлериниң продукциязын даштыкы рыноктарже нептередип тарадыр, даштыкы партнерлар-биле садыг-экономиктиг харылзааны быжыглаар сорулгалыг.
Даг-тывыш үлетпүрү, көдээ ажыл-агый комплекизи, арга-арыг үлетпүр бүдүрүлгези, туризм болгаш креативтиг үлетпүр – өзүлдениң кол угланыышкыннары кылдыр айыттынган. Бедик үнелиг барааннар бүдүрүлгези болгаш Россиядан дашкаар таныттынгыр апаар «Тывага бүдүрген» деп ылгавыр демдекти суртаалдаары – мурнады көөр угланыышкын.
Стратегияда экспортту көвүдедиринге чугула херек транспорт-логистика инфратургузуунуң хөгжүлдезинге аңгы кезекти тускайлаан. Сайгарлыкчыларга деткимчениң хемчеглерин: даштыкы экономиктиг ажыл-чорудулга билиглеринге өөредилгелерни, экспорт төлевилелдерин деткиири, Моол болгаш Кыдаттың рыноктарынче үнерин планнаан компанияларга дуза чедирилгезин база көрген.
2030 чылга чедир республиканың даштыкы экономиктиг ажыл-чорудулгазының хөгжүлдезин үнелээр 19 көргүзүглүг, тускай сорулгалыг программаны документиде бир дугаар киирген. Стратегияның күүселдези «Делегей кооперациязы болгаш экспорт» национал төлевилелдиң кезии апаар. Ол хемчеглерни федералдыг болгаш регионалдыг бюджеттерден база бюджеттен дашкаар үндезиннерден акшаландырар.
Чаартынган стратегия республикага экспорт хемчээлин көвүдедиринге, чаа инвестицияларны хаара тударынга, сайгарлыкчы чорук хөгжүлдезинге немелде аргаларны тургузарынга, Тываның делегей чергелиг рыноктарда туружун быжыглаарынга дузалаар.
Россияның Президентизи Владимир Путинниң салган национал сорулгазы – 2030 чылга чедир чурттуң чиг этке хамаарышпас энергетиктиг эвес экспортун көвүдедиринге ол документ идигни бээр деп, ТР-ниң Экономиктиг хөгжүлде яамызы демдеглээн.
