Ачы-хавыяазы улуг шииткекчи

ТР-ниң Дээди Судтуң шииткекчизи Галина Шиирипейни хүндүлүг дыштанылгаже үдээнин суд дыңнаткан. Ооң ниити күш-ажыл стажы – 47 чыл.

Галина Шиирипейге ТР-ниң Дээди Судунуң удуртулгазының мурнундан В.К. Ондар, Э.В. Орешков, А.О. Таргын, кеземче херектериниң талазы-биле суд коллегиязының даргазы Х.И. Тулуш, Шииткекчилер коллегиязының удуртукчузу А.М. Тулуш, Административтиг херектер талазы-биле суд коллегиязының даргазы Т.В. Кунгаа болгаш аппарат ажылдакчылары байыр чедирген.

Ажылчын намдарын 1977 чылда Тыва АССР-ниң Кызыл хоорай прокуратуразынга стажер болуп эгелээн. 1996 чылга чедир улуг истекчи, прокурорнуң дузалакчы, улуг дузалакчызы болуп ажылдаан.

Россияның Президентизиниң Чарлыы-биле 1996 чылда ТР-ниң Дээди Судунуң шииткекчизинге томуйлаткан. Чээрби сес чыл суд ажыл-чорудулгазының үезинде ол дерзии кем-херек үүлгедиишкиннерни, нарын херектерни көрген.

Г.Н. Шиирипей суд каттыжылгазының ажылынга база идепкейлиг киржип келген. 2007-2009 чылдарда ТР-ниң Шииткекчилерниң квалификация коллегиязының чанында шииткекчилер эрге-дужаалынче квалификация дужаар шылгалда комиссиязын удуртуп турган. Ийи хууса улаштыр, 2009-2013 чылдарда, Шииткекчилерниң квалификация коллегиязының даргазы турган. 2015 чылдан хүндүлүг дыштанылгаже үнгүжеге дээр ТР-ниң Дээди Судунуң Президиумунуң кежигүнү турган.

Хүндүлүг дыштанылгада шииткекчиниң хөй чылдар дургузунда ак сеткилдиг, үре-түңнелдиг ажыл-херээ бедии-биле үнелеттинген. Тываның алдарлыг юризи РФ-тиң Шииткекчилер чөвүлелиниң «Шиидилгеге ачы-хавыяазы дээш» деп шаңнал демдээниң, «Суд системазының мурнунга ачы-хавыяазы дээш» деп медальдың II чергезиниң, «Суд системазының алдарлыг ажылдакчызы» хүндүлүг аттың эдилекчизи. 2018 чылда «Чылдың шииткекчизи» шаңналдың лауреады болган.