Ада-чурт камгалакчыларынче ээлчеглиг чүъктү Шагаа уткуштур чорудар

Тываның Чаңгыс аай штавы тускай шериг операциязында киржип турар дайынчыларынга ээлчеглиг дузаламчыны чыып турар. Бо чылын Шагааны февраль 10-да уткуур, ынчангаш келир айның баштайгы хүннеринде ачы-дуза чыылдазы доостур.

Шагаа бүдүүзүнде хой эъдин мурнуку шугумда чаңгыс чер чурттугларывыска чедирер. Тываның мал ажыл-агыйлары декабрьның төнчүзүнде, Чаа чыл таварыштыр үш тонна эътти чорутканын сагындыраал.

Бистиң дайынчыларывыска ужудукчу чок аппараттар, дрон дүжүр адар чепсектер, караңгыда көөр херекселдер, тепловизорлар, рациялар чугула херек. Чагыг езугаар куяк кандаазыннарны база садар. Оолдарга чылыг хептерни, «чажыртынар» четкилерни дамчыдып болур.

«Улусчу фронт. Бүгү чүүлдү тиилелге дээш!» төлевилелдиң чорудуу-биле Тывадан тускай шериг операциязында киржип турар дайынчыларга ачы-буян чүъгү Шагаа бүдүүзүнде дайынчы хөделиишкиннер девискээринге чеде бээр.

Тускай шериг операциязында киржип турар дайынчыларга ачы-дуза чыыр пункт дараазында адресте ажылдап турар: Кызыл хоорай, Эки турачылар кудумчузунда 3 дугаар бажың. Харылзажыр телефон дугаары: 8 (39422) 2-10-50.