Бии-Хем кожууннуң Аржаан сумузундан дайынчы хөделиишкиннер хоочуну, “Чаа сорук” төлевилелиниң киржикчизи Буян Адышаа үргүлчүлелдиг эмнээшкин соонда, чанып келгенин чагырга чериниң даргазы Екатерина Тулуш дыңнаткан.
Буян Адышаа тускай шериг операциязынче эки турачылап чорупкан турган. Бо хүннерде Адышаалар аяс-кааң хүн бүрүзүн ажыглап, мал чемин белеткээр чымыштыг иште. Малчыннарга чоок кижилери улуг деткимчени көргүзүп турар. Өгнүң эр ээзи кышты хүр ажары-биле бир “КамАЗ” чүък машина сигенни немей садып алган.
Буян биле Светлана Адышаалар бода болгаш чылгы малды тудуп турар. Оларның кайызы-даа ажылгыр, даанган херээнге харыысалгалыг. Өгнүң кыс ээзи саан үезинде уругларынга ак чемни белеткеп берип турар. Өг-бүле үш ажы-төлдүг.
Дайынчы хөделиишкиннер хоочуну аар балыглаткан, ол ам будунга кедирер протез манап турарын чагырга чериниң даргазы медеглээн.
