Национал школа хөгжүдер институтка онза аалчы – доозукчу курстуң студентизи Айрана Сат бодунуң диплом ажылы “Уругларга – тыва дыл” деп ажылдап кылып турар сайтызын көргүзүп келгенин институт дыңнаткан.
Ажылдап турар сайтыны ажыткаш, уруглар дириг амытаннардан космиктиг бүдүмелдерге чедир билип алыр. Чүгле темазын шилиир: “Дириг амытаннар”, “География”, “Кижиниң мага-бодунуң кезектериниң аттары”, “Өңнер”, “Чурагайлар” дээш оон-даа өске.
Айрана Сат – ТывКУ-нуң физика-математика факультединиң “Фундаменталдыг информатика” адырында өөренип турар. Кандыг-даа адырда өөренип болгаш ажылдап турар кижи болза, төрээн дылының чидиг айтырыгларынга тоомча чок болбайн турары дыка өөрүнчүг.
Доозукчу курстуң студентизиниң уругларны тыва дылынга канчаар өөредип болур деп көрүп турары, сайтыны канчаар каастап кылганы, бодунуң төрээн дылынга шупту чүүлдерин танып билип алырынга кандыг темаларны шилип алганы солун болган.
Национал школа хөгжүдер институдунуң ажылдакчылары А. Саттың ажылын улам чедимчелиг болурунга боттарының сүмелерин киирген. Чижээ, чуруктар шилип алырынга, темаларны шын адаарынга, үн каасталгазын кылырынга дээш, чаа сайтының дизайн талазы-биле ажылынга саналдарын чугаалаан.