Ак- Даш сумузунга тускай шериг операциязының киржикчизи Айвар Монгуштуң чырык адынга турскааткан республика чергелиг хол бөмбүүнүң маргылдаазы болуп эрткенин чагырга чери дыңнаткан. Маадырга Эрес-дидим чоруктуң орденин мөчээниниң соонда тывыскан.
Үш дугаар чыл эртип турар маргылдаага 18 команда киришкен. I черни Чөөн-Хемчиктиң арга-арыг даамалының, II черни Суг-Аксының, III черни Чадаананың командалары чаалап алган. Тиилекчилер өртектиг белектер болгаш дириг хой-биле шаңнаткан.
Маадырның өөнүң ишти Чинчи Монгуш беш ажы-төлү-биле арткан. Ол өөнүң ээзи-биле кады тудуп эгелээн улуг бажыңын улуг оолдары Аржаан база Алдын-Херел-биле тудуп дооскан. Авазының дузалакчылары спорттуң шупту хевирлеринге сонуургалдыг. Амгы үеде Тываның күрүне университединиң куш-культура болгаш спорт факультединиң студентилери. Ажыл-ишчи аныяк ие маг-маганын база тудуп турар. Бичиилери Дуяна школачы, Даяна биле Мөңгүн-Херел садик назылыг.
Айвар Монгуштуң өөнүң ишти, дөргүл-төрелдери маргылдааны демнежип эрттирип турар. Ак-Даш школазының, суму чагыргазының коллективтери улуг деткимчени көргүскен.
Тускай шериг операциязының үезинде бажын салган маадырларның чоок кижилери оларның аттарын мөңгежидер дээш, «Маадырның парталарын» болгаш тураскаал самбыраларны ажыдып, ада-чуртчу болгаш спортчу хемчеглерни (хүреш, хол база бут бөмбүү, шыдыраа, аът чарыжы, балык тудары дээш оон-даа өске) эрттирип турарын чагырга чери онзалап демдеглээн.
