Тыва үндезин культура төвүнге мөзүлүг ада кижиниӊ, буянныг ие кижиниӊ овур-хевирин чаштарга үлегер-чижек кылдыр көргүзер болгаш өг-бүле кежигүннерниӊ аразында быжыг харылзааны нептередир сорулгалыг «Айым биле хүнүм болган – авам, ачам» деп хоорай чергелиг Россияда чарлаттынган Өг-бүле чылынга тураскааткан ханы уткалыг, чараш мөөрей болуп эрткенин төп дыңнаткан.
«Таныштырылга», «Чаӊчылдарым – чараш», «Аас чогаал мөөрейи», «Кавайлыымдан өпей ырым» база «Тыва оюннар мѳѳрейи» деп кезектерден тургустунган хемчегге ниитизи-биле алды өг-бүле киришкеннер.
Мөөрейниң түңнелинде бирги черни Кызылдың 17 дугаар уруглар садының төлээлекчилери Кууларларның өг-бүлези Сыдым Мактал оглу, Сай-Суу Алдын-ооловна база оглу Сүлде чаалап алганнар. Ийиги черни Кызылдың 28 дугаар уруглар садының мурнундан киржип чедип келген Монгуштарның өг-бүлези Аяс Владимирович, Аюна Андреевна база оглу Кан-Хулер алганнар. Үшкү черге 8 дугаар уруглар садындан Кыргыстарның өг-бүлези Буян-Херел Викторович, Шончалай Арандоловна база уруу Оюу төлептиг болганнар.
Киржикчилерниң тускай салым-чаяанын ылавылап, шииткекчилер дараазында номинацияларны тус-тузунда тывысканнар.
“Соруктуг өг-бүле” – Кежик аттыг 12 дугаар уруглар садының төлээлекчилери Хомушкулар – Дугаржап Андреевич, Чаяна Белековна база уруу Камила, “Чаңчылдар эдилекчилери” – «Сылдысчыгаш» 9 дугаар уруглар садының төлээлекчилери Баданайларның өг-бүлези - Начын Тайбынович, Ая Юрьевна база оглу Батый, “Салым-чаяанныг өг-бүле” – Кызыл хоорайның “Алдын дүлгүүр” 1 дугаар уруглар садының төлээлекчилери Монгуштарның өг-бүлези Мөңге Алексеевич, Алена Юрьевна база уруу Амила.
Мөөрейни эрттиреринге улуг деткимчени көргүскен Тываның күрүнениң ойнаар-кыстар театрының удуртукчузу Станислав Ирильге К. Б. Ондар аттыг тыва улустуң езу-чаңчылдарының, аас чогаал болгаш ус-шеверлер төвү өөрүп четтиргенин илереткен.
Кижиниң ажы-төлүн өөредир, сайзырадыр, кижизидер делегейи – өг-бүле. Бүзүрелдиң, идегелдиң, ынакшылдың уязы – өг-бүле. Кижиниң сагыш-сеткил культуразының, делегейже көрүүшкүнүнүң, бүгү талазы-биле мөзүлүүнүң быжыг өзээ өг-бүле иштинге тургустунар.
