Кызыл-Мажалык сумузунда Айыраң Күжүгет нугуушкун кылыр кабинетти эрткен чылын февраль айда ажыткан.
Аныяк сайгарлыкчы боду эмчи эртемниг. Иркутск хоорайга өөренип тургаш, мага-бот нугуур мергежилди база чедип алган. Айыраң хууда ажыл-херээн ажыдып алыр дээш, Барыын-Хемчик кожууннуң Чонну ажылга хаара тудар төвүнче документилерин дужаагаш, комиссияга төлевилелин ажыктыын тайылбырлап, шынзыдып шыдаан.
– Студент үелеримде төрээн чуртумга нугуг кылыр салон ажыдар күзел тывылган. Социал четкилер дамчыштыр ажыл-херээн ажыдып алыр деп турар хамаатыларга күрүне программазының дугайында билип алдым. 2020 чылдың төнчүзүнде күрүне деткимчези-биле нугуг кылырынга чугула херек дериг-херекселди садып алдым. Шак ынчалдыр 2021 чылда күзелимни амыдыралда боттандырганым ол. Черле ынчаш бистиң кожуунда нугуушкун кылып турар улус чок болурга, ук ачы-дуза чедирилгезин ажыдар күзелим улам күштелген. Кожууннуң төвүнде почта салбырында өрээлди хөлезилеп турар мен – деп, аныяк сайгарлыкчы ажыл-херээн канчаар эгелеп алганын таныштырган.
Нугуушкун кабинединиң ээзи мага-бот, оорга, моюн, баш, таваңгай, хол-бут, бумбалаар, ары чигири-биле нугуушкунну кылып турар. Ол ышкаш арынның овурун хевирлээр дээш өске-даа косметиктиг нугуг бар.Ук ачы-дуза чедирилгезиниң өртек-үнези 400 рубльден өрү.
Ары чигири-биле нугуг он хонук уламчылаар. Ынчалза-даа Айыраң улустуң күзелин өөренип көргеш, үш-беш-даа хонук ук ачы-дуза чедирилгезин кылыр. Чонну шупту санитарлыг негелделерни сагып тургаш хүлээп турар.
«Социал керээ» программазының киржикчизи билиин доктаамал бедидип турар. Бо чылын ол Уфа хоорайга хан эргилдези экижидер нугуг аргазынга өөренип алган.
