Ак-Довурактың өөредилге эргелелиниң ажылдакчылары башкылар-биле кады “Айыыл чок чай” акцияның чорудуу-биле малчын аалдарны кезип, ажык хөөлбектерни хынап чорутканын өөредилге чери дыңнаткан.
Ажылчын бөлүк чайлагларга уруг-дарыгның дыштанылгазын амыр-менди эрттирер талазы-биле тайылбыр ажылын чорутканнар. Улуг кичээнгейни уругларның хемнерге эштиринче сагыш салырынче, аът-хөл-биле оваарымчалыг болурунче олар угландырган.
Каш хонук бурунгаар малчын аалдан читкен үш харлыг оолду ийи хонук болганда тып алганын сагындыраал. Ынчангаш улуг улус ажы-төлүнүң амы-тыны болгаш кадыкшылы дээш харыысалгалыг болур ужурлуг. Оларны карак салбайн хайгааравас болза, айыыл-халап карак чивеш аразында болуп болурун утпазы чугула.
Малчын аалдарже тайылбыр ажылдыг үнүүшкүннерни ам-даа уламчылаар.
